Петыр-Павел вичко (Кулӧмдін)

Кулӧмдінса Петыр-Павел вичко (2011 во)

Петыр-Павел вичко (кыпӧдӧма 1799 во–1810 во) – Кулӧмдiн сиктса православнӧй вичко.

XIX нэм

Кулӧмдінын Петыр-Павел вичко босьтчисны кирпичысь кыпöдны 1799 воын, уджъяссö помалісны 1810 воын. 1820 вося кӧч тӧлысьын вежöдiсны Петыр да Павел апостолъяслöн нимъясöн.

1867 воын тайö вичкоас Литургиясö служитiс Вӧлӧгдаса да Югдінса епископ Павел.

1883 воын кутшöмкö Василий Фёдорович Панюков танi примитöма военнöй присяга да мунöма служитны император армияса стрелковöй полкö.

1875 вося ведомосьтъясын пасйöма, мый вичкоса эмбур зэв гöль (важиник кöлуй, пу да ыргӧн тасьтi-пань, медся колана ен небӧгъяс).

1875 вося ода-кора тӧлысь 28 лунö Петыр-Павел вичкоса настоятельöн пуктöма Василий Дмитриевич Садоков (сылы вöлöма 51 арöс). Дöвеч, öтнас быдтöма кык нылöс: 17 арöса Раиса (кужö лыддьысьны), 11 арöса Ольга (сы кадö велöдчöма Тотьмаын нывбаба прогимназияын).

Настоятельлöн отсасьысьöн вöлöма Попов Василий Константинович. На кындзи вичкоын зiлисны мукöд кадас: священник о.Палладий, псаломщикъясöн Андрей Тимофеевич Попов да Исидор Алексеевич Попов, дьяконъясöн – Николай Тюрнин, Стефан Тюрнин да Михаил Алексеевич Тюрнин (сiйö 40 во уджалiс вичкоас).

Притчас (штатса уджалысьяс) вöлöма 3 морт: настоятель да кык псаломщик. Настоятельлöн керкаын: «малый деревянный и весьма ветхий». Та вöсна община медалöма кресьтянин керкаысь жыр. Псаломщикъяс олöны ас керкаас.

Куим морта притчлöн удждоныс 164 шайт 64 ур. На пиысь настоятельлы – 105 шайт 84 ур, медводдза псаломщиклы – 35 шайт 28 ур, мöдыслы – 23 шайт 52 ур.

1880 вося Клирöвöй ведомосьтын гижöма, мый Петыр-Павел вичкоын эмбурыс содöма. Вичкоын эм: «церковных облачений хороших – 5, посуда разная: медная посеребрянная и оловянная, Евангелий – 4, два из них обтянуты малиновым бархатом, наугольники и средник – серебряные 84 пробы, купель для крещения младенцев и венцы для брачующихся медные, книги Богослужебные почти все в двух рядах…». «Земли усадебной (огородной) было выделено около 500 сажен, пахотной и сенокосной – около 10 десятин. С пахотной земли снято хлеба 8 четвертей на 35 рублей, заготовлено сена 50 возов на сумму 50 рублей, которое шло на прокорм 4 лошадей, 6 коров, 8 овец».

1880 воын вичкоса кассаö (кружка) воöма 882 шайт 64 ур. Тайö сьöм локтöма требаысь, молебенысь, казьтылöмъясысь, Рöштво да Ыджыд лун празьникъяс нуöдöмысь. Неуна сьöм настоятель ним вылö вöлi ыстöма Зeмскöй пошта пыр Усть-Сысольскса духовнöй управлениеысь либö Вöлöгдаса духовнöй консисториысь Епископ нимсянь. Вичкоö сiдзжö волöны матысса грездъясысь эскысьяс.

1879 вося кӧч тӧлысь 6 лунсянь Петыр-Павел вичкоын настоятельöн индöма Николай Михайлович Доброумов. 1879 вося ӧшым тӧлысь 4 лунö сiйöс пуктiсны Кулöмдiн сиктса подув училищеö Законоучительöн. Сiйö вöлi уна велöдчöм мортöн, Яренскса Преображенньö собoрса заштатнöй священник Филофейлöн пиöн. Сы кындзи, Н.М. Доброумов вöлi 5-öд кытшса благочиннöйöн.

1886 воын Петыр-Павел вичко выльысь вежöдöма сотчöм бöрас. Вичко посводзас (папертьын) вöлöма Нерукотворнöй Спаслöн öбраз, кодöс ас кадö Ен отсöгöн вермöмаöсь видзны биысь – Николай Чудотвореч вичко сотчигöн шыбитöмаöсь Эжваö.

1890 воын вöчöма кöлöкöльня, жыннянлöн сьöктаыс вöлöма 204 пуд.

1900-öд вояс

1903 вося рака тöлысьсянь – 1906 вося öшым тöлысьöдз Петыр-Павел апостолъяслöн вичкоын попалöма иерей Николай Николаевич Доброумов. Кулöмдiнö сiйöс вуджöдöмаöсь Помöсдiнса Енмамлöн Успенньö вичкоысь. Усть-Сысольска духовнöй училище да Вӧлӧгдаса семинария помалöм бöрын Югдінса еписком Гавриил 1899 воын бласлöвитiс сiйöс служитны Помöсдiнса вичкоын. А 1906 воын Кулöмдiнысь Николай Доброумовöс вуджöдiсны Аныбö. 2001 вося йирым тöлысь 6 лунö Вежа Синод шуис иерей Николай Николаевич Доброумовöс вежаöн да пыртiс Коми му югдöдысь новомученникъяс лыдö.

1930-öд воясö Петыр-Павел вичколысь пытшкöссö вöлi мавтöма кельыдлöз рöмöн да мичмöдöма зарни серъясöн да дзоридзьясöн. Танi югъялöма ыджыд паникадилö. Царскöй вöрöта öтар-мöдарладорас вöлöмаöсь колоннаяс. На бокын öта-мöдыслы паныда сулалöмаöсь сус пуысь вöлалöм 1 метр судтаа, кианыс важ гижöда анделъяс. Вичкосö мичмöдöмаöсь и важся мича öбразъяс, а шуйга кырлöс саяс öшалöма Николай Чудотвореч вежалы важся öбраз да житие, кодöс чайтöмаöсь чудотворнöйöн. 1898 воын Николай II-öс императорö коронуйтöмкöд йитöдын тайö öбраз дорас ньöбöмаöсь да ладмöдöмаöсь зарниöдöм озысь веркöс (риза).

Петыр-Павел вичкосянь рытыв-войвывланьын вöлi Николай Чудотвореч вичко, а сыкöд орччöн – пу кöлöкöльня. Став вичкосö 1902 воын кытшалöма кöрт потшöс, кодi нюжалöма матö 170 сажень. Лунвывладорын вöлöма кирпичысь неыджыд стöрöжка. Вежа стрöйбаяс гöгöрын быдмисны кыдз да сус пуяс. Петыр-Павел вичко бокын öнiöдз на эм öти кыдз пу, код улö, кыдзи висьталöны важ йöз, дзеблöмаöсь кутшöмкö ыджыд чина мортлысь кагасö. Вичко потшöс сайын, öнiя Берегдор улича вылын, вöлöма шойна.

1930-öд вояс

1933 воын Коми облисполкомса веськöдлысь Ильчукова мöдöдалiс письмöяс, медым вичкояс тупкалiсны став Коми му пасьта. И тайö индöдсö босьтчисны пöртны олöмö. 1937 вося йирым тöлысь 17 лунö Н.И. Мишаринлöн веськöдлöм улын Макар Öльöш да Карö сиктъясса олысьяс, ставыс 111 морт, гöлöсуйтiсны вичко сиптöм вöсна. Сiйö жö лунас «Буденный» колхоз нуöдiс собрание, кöнi П.А. Чаланов ышöдiс вичко керкаын восьтны клуб. Иван Липин тöдчöдiс: «Вичкосьыс тöлк абу, сы местаö бурджык восьтны культура керка». К. Мишарин содтiс: «Вичкояссö быд сиктын кисьтöны, колö бырöдны и миянын».

Йирым тöлысь 18 лунö «Ленин туйöд» колкозлöн собрание вылын Семяшкин висьталiс: «Царлöн правительство ассьыс власьтсö ёнмöдiс вичко отсöгöн. Сöвет власьт юкис вичкосö государство бердысь. Кызь во стрöитам социализм, и вичколы тырмас нин гудыртны йöзлысь вежöрсö. Сiйö öнi падмöдö миянлысь олöм». Семяшкин дор сувтiсны мукöд да шуисны: тупкыны Петыр-Павел вичко. Кывкöртöдсö мöдöдiсны райисполкомö, кодi сэсся шыöдчис облисполкомö.

1938 вося рака тöлысь 21 лунö облисполкомса президиум могмöдiс кулöмдiнсалысь Петыр-Павел вичко сиптöм кузя корöмсö да урчитiс восьтны сэнi кусöдчысьяслысь депо. Но Кулöмдiнысь Енлы эскысьяс эз öвсьыны, ветлöдлiсны сикт-грездъястi, чукöртiсны кырымпасъяс, медым вичкосö восьтны бöр. Медся нырччысьöн вöлi Чупров, кодöс власьтбердсаяс шулiсны троцкистöн.

1938 вося вöльгым тöлысь 23 лунö «Ленин туйöд» колхозын бара котырлiсны чукöртчылöм, кöнi чорыда шуисны: «Мыррддьыны эскысьяслысь Петыр-Павел вичкосö да СССР-са Верховнöй Сöветö бöрйысьöмöдз восьтыны сэнi районса пионеръяслысь керка», корисны панны троцкист Чупровлы да сы коддьöмъяслы паныд уголовнöй делö. Паныд мунысьясöс эз кывзыны, вичко тупкисны, попъясöс йöршитiсны дзескыдiнö.

Петыр-Павел вичкоысь ыджыд кöлöкöльнясö жугöдiсны (висьталöны, мый сылöн шыыс кылöма Уллянаöдз); сы пыдди вöчöма вевт.

Вичко вöлтарын писькöдiсны öдзöсъяс, медым сэтi вермис пырны сьöкыд техника, а вежа жырйын восьтiсны куритчанiн. Тöдтöм йöз чукöртiсны вичкоысь став енсö да нуисны сиктсöветö ломтыны пач. Шуöны, сельсöветын пачсö сэки ломтöны вöлöм гозъя. Найö вежавидзöмаöсь вöчны Ен водзын татшöм ыджыд мыжсö да вуджöмаöсь овны мöд сиктö.

Дыр кад чöж вичкоын вöлi кусöдчысьяслöн депо, а сэсся гараж да ДОСААФ.

1990-ӧд вояс

Петыр-Павел вичко бöр ловзьыны кутiс 1991 воын, кор песионерка Агафья Егоровна Кипрушева мукöд эскыськöд öтвылысь шуисны выльмöдны Кулöмдiнса вежаинъяс. 1991-öд вося урасьӧм тӧлысьӧ лои котыртöма община да пасйöма. Сиктсöветöн веськöдлысь А.А. Липин сетiс сы борд улö Кулöмдiнын вичкояслысь кольöм стрöйбаяссö: Петыр-Павеллысь öти судтаа, Енкаянлун да Владимирса Енмам öбраз престолъяса кык судтаа гожся храмъяс.

Медводз шуисны дзоньтавны-выльмöдны Петыр-Павел нима тöвся вичкосö. Общинаса старостаöн бöрйисны фронтовик, Япониякöд да Айму вöсна Ыджыд тышъясса ветеран Милослав Николаевич Игнатовöс. Вичко сöстöммöдöм да выльмöдöм бöрын кутiсны волывлыны Сыктывкарысь попъяс, медым нуöдны службаяс, а Улляна манастыр воссьöм бöрын кежавлiс и Сыктывкарса да Воркутаса епископ Питирим.

1992 воын Петыр-Павеллöн вичкоын ыджыдавны владыка Питирим индiс отеч Ионаöс (Скибинöс).

2003 вося йирым тӧлысьсянь отеч Ионалöн кувсьöм бöрын службасö кутiсны нуöдны Уллянаса манакъяс. Манастырöн сэки юрнуöдiс отеч Роман (Овсиенко).

2006 вося кӧч тӧлысь 10 лунсянь еписком Питиримлöн индöд серти Петыр-Павел вичкоын попöн зiльö иерей Александр Антонов (матушкаыс – Ольга).

2011 восянь вичкоын уджалысьяс дасьтöны «Кулöмдiнса вежаинъяс» небöг да чукöртöны 10 миллион сьöм, медым дзоньтавны Кристос ловзян кык судтаа Кулöмдiнса вичко.

Ӧтуввез-сайт

Петыр-Павел вичколӧн сайтъяс – http://ust-kulom-hram.ucoz.ru/ да http://ust-kulom-hram.ucoz.ru/

Ӧшмӧсъяс

Нестерова Г. Вичко ловзис // Парма гор, 2007 во. Ода-кора тöлысь 22 лун.
Кулöмдiнса вежаинъяс // Коми му, 2012 во, косму тöлысь 12 лун.
Петыр-Павел вичколӧн сайт