Молодцов Сандрӧ Васьӧ

Молодцов Сандрӧ Васьӧ (1886—1940)

Молодцов Сандрӧ Васьӧ (рочӧн Василий Александрович Молодцов) (1886-1940) — коми кыв туялысь, велӧдӧм да культура юкӧнын водзмӧстчысь.

Олан туй

Василий Молодцов чужис 1886 вося тӧвшӧр тӧлысь 13-ӧд лунӧ Вӧлӧгда губерняысь Усть-Сысольск уездса Тентюков сиктын.

1907 воын помаліс Тотьма карын велӧдысьяслысь семинариа. 1907—1908 воясӧ велӧдіс Эжва йывса Парч грездын. 1908—1909 воясӧ велӧдчис Петыркарын велӧдчан курсъяс вылын, а 1910—1911 воясӧ велӧдіс Тотьма уездса Михеево грездын. 1911—1914 воясӧ велӧдчис Петербургса велӧдысьяслӧн институтын. Помалӧм бӧрас куим тӧлысь вӧлі военнӧй служба вылын. 1914—1917 воясӧ велӧдіс Ношульса школаын, кӧні босьтчис лӧсьӧдны коми кывлы анбур.

1918-ӧд воын лӧсьӧдіс коми кывлы сідз шусяна Молодцов анбур, мыйӧн вӧдитчылiсны комияс 1918—1932 да 1936—1938 воясӧ, а перымса комияс — 1921—1932 воясӧ.

Куліс Сыктывкарын 1940 вося моз тӧлысь 31-ӧд лунӧ.

Медшӧр небӧгъяс

• Санԁрӧ Ваԍӧ. Лыԃԃыԍны велӧԁчан. — Сыктывԁін кар, 1920.
• Санԁрӧ Ваԍӧ. Комі грамаԏіка туј піԍкӧԁыԍ. — 1921.
• Молодцов В. Некоторые принципы зырянского правописания. — Усть-Сысольск, 1927.
• Молодцов В. К грамматической классификации слов зырянского языка. — Усть-Сысольск, 1928.
• Молодцов В. Фонетика зырянского диалекта языка коми. — М., 1929.

Паметь

• Сыктывкарын 2012 воын выль уличалы сетӧма В.А. Молодцовлысь ним.
• Сыктывкарын 2014 вося ӧшым тӧлысь 23-ӧд лунӧ казьтылана пӧв ӧшӧдӧма Нагорнӧй уличаса 47 №-а керкаӧ, кӧні овліс В.А. Молодцов.

Ӧшмӧсъяс

• Коми Республикаса национальнӧй архивлӧн сайтын В.А. Молодцовлӧн олан туй
• Жеребцов И.Л. Его величество Алфавит / Василий Молодцов «скрепил» создание Коми автономии новой фонетикой // «Республика» газетлӧн сайт, 2011 во, ода-кора тӧлысь 28-ӧд лун, 108 №. (рочӧн)
• Жеребцов И.Л. В.А. Молодцов // Связь времен. — Сыктывкар, 2000. — С. 283.