Сьӧдъюр

Босьтӧма Wikipediaысь
Сьӧдъюр
Cuculus canorus bangsi + Sylvia atricapilla

Перк (латин Sylvia atricapilla; рочӧн Черноголовая славка; черноголовка; славка-черноголовка) — пышкай сяма лэбачьяслӧн котырӧ пырысь тылаборда.

Лэбачьясӧс туялысьяс славкаяслысь став сикассӧ Му сяр пасьтала арталӧны 400 сайӧ. На пиысь 51-ӧс пасйӧны Россияысь, Коми муын паныдасьлӧ 17 сикасӧдз. Ӧти вужъя лэбачьясыслысь, сьӧдъюрысь ӧтдор, нӧшта позьӧ вайӧдны татшӧм нимъяс: сэтӧр кай «садовая славка», намӧдчысь кай «серая славка», тусяпу кай «славка-завирушка» да с.в.

Ыджда да рӧм[вежны | Вежны кодировкаын]

Тушаыслӧн кузьтаыс овлывлӧ 15 сантиметрӧдз. Мышку вылыс айыслӧн вежовруд, балябӧжыс, сьыліыс да бӧж вевдорыс руд, вывтыр улысладорыс кельыдруд, кынӧмыс еджгов. Синмад шыбитчӧ юр пыдӧсыс — сэтчӧ быттьӧ сьӧд рӧма кышӧд пуктӧмаӧсь. Эньыслӧн сэті абу сьӧд, а гӧрдов.

Паськалӧм[вежны | Вежны кодировкаын]

Сьӧдъюръяс олӧны-вылӧны Европа пасьтала да Сибырса муясын Об ю дорӧдз. Миянын быдтысьӧны Летка ю ковтысын, Печора юбердса вӧраинъясын да мукӧдлаын.

Поздйысьӧм[вежны | Вежны кодировкаын]

Поздысьӧны оз парма пасьтала, а сӧмын кустъяса вӧр дорӧсъясын. Позсӧ лӧсьӧдігӧн мырсьӧны гознан лэбачыс квайт лунӧдз кымын. Тэчӧны сійӧс бӧрйӧм кустлӧн вожъяс костӧ либӧ пу вылӧ, но мусяньыс оз ёна вылӧ. Позтырас овлывлӧ еджговняйт рӧма да сьӧдовгӧрд чутъяса вит колькйӧдз. Пӧжсигас позъяс пукалӧны кыкнан лэбачыс ӧта-мӧдсӧ вежлалӧмӧн. Кольксьыс петӧм бӧрын кайпияныс пондӧны лэбавны 12 лун мысти. Но борд йылас кыпӧдчӧм бӧрын найӧс бать-мамныс лун дасӧдз на дӧзьӧритӧны-вердӧны. Сы бӧрын сӧмын том быдтасъясыс дзикӧдз эновтӧны чужан познысӧ.

Сёян[вежны | Вежны кодировкаын]

Пӧткӧдчӧны сьӧдъюръяс гут-гагйӧн, гожӧмнас чӧсмасьӧны тшӧтш кисьмӧм вотӧсӧн. Кокалӧм мольясыслӧн пӧ кӧйдысыс чулляс оз изсьы да, найӧ веськалӧны-паськалӧны оз сӧмын матігӧгӧрӧ, но и ылі местаясӧ, кытчӧ лэбзьывлӧны лэбачьясыс.

Оласног[вежны | Вежны кодировкаын]

Кӧдздӧдігӧн сьӧдъюръяс эновтӧны чужанінсӧ да тӧвйӧны шоныд муясын — та могысь воӧдчывлӧны Грецияӧдз, Италияӧдз да Войвыв Африкаӧдз.

Рӧдвуж кывйын[вежны | Вежны кодировкаын]

Удмуртъяс кайсӧ шуӧны сьӧдйырӧн. Нимсӧ лӧсьӧдігӧн комияс моз жӧ тӧд выланыс босьтӧмаӧсь лэбач юрыслысь сьӧд рӧмсӧ.

Мукӧдтор[вежны | Вежны кодировкаын]

  • Сійӧс, кыдзи сьылысь кайӧс, лэбачьясӧс радейтысьяс донъялӧны зэв вылӧ. Та серти пӧ сӧмын колипкайлы неуна ворссьӧ, а сэсся некодлы оз.

Ӧшмӧсъяс[вежны | Вежны кодировкаын]