Коми Республикаса вужвойтырлӧн шылада-драмаа театр

Коми Республикаса вужвойтырлӧн шылада-драмаа театр (роч. Национальный музыкально-драматический театр Республики Коми) — Сыктывкарын драмаа театр, коді воссьӧма 1992-ӧд воын. Водзынджык вӧлі шусьӧ Фольклор театр. Тайӧ дзик ӧти театр Комиын, Россияын да став мирын, кӧні став спектакльыс мунӧ сӧмын комиӧн (роч кыв вылӧ ӧттшӧтшъя вуджӧдӧмӧн). Театрлы подув пуктысьыс — Россия Федерация искусствоясын нимӧдана уджалысь С. Г. Горчакова.

История

Театр вӧлі лӧсьӧдӧма 1992-ӧд воын Коми АССР-са министръяслӧн сӧвет шуӧмӧн. Театр вӧлі восьтӧма кыдзи Фольклор театр. Сылӧн могыс — видзны аслыссикас коми кыв да культура.

Театрлы вӧлі кӧртымалӧма торъя жыр (Пушкин ул., 21) (площадь 48 км.м.). Ворсысь труппаӧ пырисны «Парма» сьылан котырысь дас морт да республикаса искусствояс училишӧысь театр юкӧнса 8 велӧдчысь.

2005-ӧд вося моз тӧлысьын Коми Республикаса Веськӧдлан Котыр Шуӧмӧн театр кутіс шусьыны Коми Республикаса войтырлӧн шылада-драмаа театрӧн.

Спектакльяс

Театр пуктӧ коми фольклор, коми кывбуралысь, прозаик да драматург гижӧдъяс подув вылын спектакльяс. Вӧлі пуктӧма татшӧм жанръяса спектакльяс:

«Дорйысь-кутысь Ен мам» йӧзкостса драма
«Керча-ю козяин» шылада-эпоса поэма
«Ар — гӧтрасян кад», «Коркӧ муса, коркӧ абу», «Гӧтрась, пиӧ, гӧтрась» да «Прӧщай, любовь» шылада комедияяс
«Йӧла гор» мифология подула висьт
«Кык бать» ӧнія драма
«Макар Васька — сиктса зон» комедия
«Но-о, биа бордаяс!» легенда-быль
«Зарни сюра кӧр», «Бедьпи» да «Ёма да Чача» челядьлы мойдъяс
«Шудӧй, эн дзебсясь, эн вош» драма
«Пармаын вошӧм БТР» фантастика-боевик
изьва-колва эпос серти «Ясӧвӧй» шылада драма
«Мамлӧн сьӧлӧм» мелорама, да мукӧд

Коми классикъяс кындзи театрын пуктӧма фин, маддяр да роч авторъяслысь пьесаяссӧ коми кыв вылӧ вуджӧдӧмӧн.

2010-ӧд воын театр пуктӧма «Ручильӧй да Кӧчильӧй» челядьлы медводдза опера коми кыв вылын (шылад гижысьяс А. Г. Горчаков). 2011-ӧд воын тайӧ операсьыс сетӧмаӧсь Коми Республикаса Веськӧдлан Котырлысь премия.

Войтыркостса фестивальяс

1993—1995 — театръяслӧн «Бомба» войтыркостса фестиваль (Нурмес, Финляндия)
1997 — Войвывса войтырлӧн XX фольклор фестиваль(Гданьск, Польша)
1998 — Фольклор фестиваль (Бургас, Болгария)
1999 — фольклор фестиваль (Тарту, Эстония)
2000 — «Ош праздник» фестиваль (Хельсинки, Финляндия)
2001 — театръяслӧн «Ugri» фестиваль (Иматра, Финляндия)
2005 — «Jutajaiset» фестиваль (Рованиеми, Финляндия)
2002 — «Виват, Меценат!» фестиваль (Москва)
2002, 2004, 2008, 2010 — финн-йӧгра войтырлӧн «Майатул» войтыркостса фестиваль (Йошкар-Ола, Мари Эл, Россия)
2006, 2007 — «Riddi—Riddi» фестиваль (Норвегия)
2007 — Фестиваль (Будапешт, Венгрия)

Та кыдзи, театрса труппа ворсӧма Петрозаводскын, Наръяна-Марын, Екатеринбургын, Йошкар-Олаын, Кудымкарын, Москваын, Саранскын, Петыркарын, Перым крайын да мукӧдлаын.

Ворсысьяс

Ӧшмӧсъяс

Коми Республикаса войтырлӧн шылада-драмаа театрлӧн история (комиӧн и рочӧн)
Коми театр: время и люди. — Сыктывкар: АУ РК «Издательский дом Коми», 2013.

Ыстӧдъяс