Гожся Олимпиада ворсӧмъяс (2020)

Материал из Wikipedia
Перейти к навигации Перейти к поиску

Гожся Олимпиада ворсӧмъяс (2020) (фр. Jeux Olympiques d'été de 2020, англ. 2020 Summer Olympics, яп. 2020年夏季オリンピック Нисэн нидзю: нэн Каки Оримпикку) — комын кыкӧд гожся Олимпиада ворсӧмъяс, кодъяс мунісны 2021-ӧд вося сора тӧлысь 23-ӧд лунсянь моз тӧлысь 8-ӧд лунӧдз Японияса Токио юркарын. Кӧсйӧны вӧлі нуӧдны 2020-ӧд воын, но COVID-19 пандемия вӧсна вуджӧдісны 1 во вылӧ.

История[веськӧдны | править код]

32-ӧд гожся Олимпиада ворсӧмъяс вылӧ локтӧма 200 гӧгӧр странаысь 11 сюрс спортсмен. Россияса сборнӧйын — 335 морт (таысь кындзи запасын кызь атлет). Тайӧ ёна унджык Рио-де-Жанейроса 2016-ӧд вося Олимпиада серти, кытчӧ вит во сайын допинг вӧсна эз лэдзны Россияысь уна спортсменӧс. Но сэк жӧ и этшаджык мукӧд ворсӧмсьыс. Сідз, Пекинса Олимпиадаын вермасьӧма Россияса 455 атлет. А ӧткодявны кӧ США-кӧд, налӧн командаыс Токиоын миян серти кык пӧв ыджыдджык.

Россияса сборнӧйын 150 мужичӧй да 185 нывбаба. Шӧркодь арлыдыс 27 арӧс. Медся том — 16 арӧса гимнастка Виктория Листунова. А верзьӧма спортын петкӧдчас 56 арӧса Инесса Меркулова.

335 спортсменысь ӧтдор Токиоӧ локтӧмаӧсь тренеръяс, федерацияясӧн веськӧдлысьяс, командаясӧн юрнуӧдысьяс, ковид-офицеръяс, массажистъяс, врачьяс, менеджеръяс, механикъяс, конюкъяс, операторъяс, ветеринаръяс да кык психолог. Делегацияас кӧсйылӧмаӧсь пыртны и священник Андрей Алексеевӧс, но бӧръя здукас бӧр киритӧмаӧсь.

Миян сборнӧйӧ спортсменъясыс веськалӧмаӧсь Россияса 49 регионысь. Медся уна, 91 морт — Москваысь, медся этша — Севастопольысь. Дзик ӧти морт, волейболистка Анна Лазарева — суйӧр сайысь (сійӧ ворсӧ Стамбулса «Фенербахчеын»).

Художественнӧй гимнастикаын вермасьӧны двӧйни — Дина да Арина Аверинаяс, триатлонын — Дмитрий да Игорь Полянский вокъяс, гандболын — Анна Вяхирева да Полина Кузнецова чойяс. Варччыны мӧдасны кык Дарья Устинова (ӧтиыс уялӧ крольӧн, мӧдыс — мыш вылас). Фехтованиеын петкӧдчас Россияса Олимпийскӧй комитетӧн веськӧдлысь Станислав Поздняковлӧн София нылыс.

Россияса сборнӧйын Олимпиадаса 24 чемпион, спортса 139 заслуженнӧй, 136 войтыркост тшупӧда да 54 мастер, мастерӧ 4 кандидат. Куимлӧн — спортса медвылыс разряд.

Миян спортсменъяс медальяс вӧсна вермасьӧны 83 прӧчент спорт сикасын. Некод оз петкӧдчы бейсболын, софтболын, ыджыд баскетболын, турун выв хоккейын, футболын, гольфын, скейтбордингын да сёрфингын.

Рочмуса команда вермасьӧ Токиоын Олимпиадаса еджыд дӧрапас да кып пыдди Чайковскийлӧн концертысь шылад улын.

Гожся Олимпиада-2020 вылын Комиысь некод абу. Сэтчӧ вермӧма веськавны Ижкарысь Мария Черепанова, коді ворсӧ баскетболӧн Сыктывкарса «Ника» клубын, но Токиоӧ мунӧм водзвылын сійӧ доймӧма. Вӧлӧма позянлун веськавны сборнӧйӧ республикаса варччысьяслӧн, но абу сяммӧмаӧсь бура петкӧдчыны.

Медальяс юклӧм[веськӧдны | править код]

Медальяс юксисны татшӧм ногӧн[1]:

Страна Зарни Эзысь Ыргӧн Ставнас
АӦШ 39 41 33 113
Китай 38 32 18 88
Япония 27 14 17 58
Ыджыд Британия 22 21 22 65
Россия 20 28 23 71
Австралия 17 7 22 46
Голландия 10 12 14 36
Франция 10 12 11 33
Германия 10 11 16 37
Италия 10 10 20 40
СТАВНАС 340 338 402 1080

Ӧшмӧсъяс[веськӧдны | править код]

  • [1] Комиысь Токиоын некод абу // Коми му, 2021.07.29-ӧд лун

Ыстӧдъяс[веськӧдны | править код]

  1. https://sportmail.ru/tokyo/medals/