Куття лун

Материал из Wikipedia

Куття лун (рочӧн Сочельник) - православнӧй вичкоса гаж, пасйӧны тӧвшӧр 6-ӧд лунӧ.

Куття лунӧн шуӧны Рӧштвоӧдзса лунсӧ. Сы рытӧ помасьӧ Рӧштво видз, коді кыссьӧ вӧльгым 28-ӧд лунсянь. Куття лун кежлӧ дасьтӧны куття рок. Куття роксӧ вӧчӧны шабді выйысь да шыдӧсысь.

Куття лунӧ помасьӧ кос лунъя, заводитчӧ уль лунъя - позьӧ нин сёйны йӧла-яя сёян. Пызан вылӧ лэптӧны рысь, йӧв, нӧк, яя шыдъяс, нӧкъя шаньгаяс, пирӧгъяс.

Кӧзяйкаяс сю пызьысь кӧтӧны сук шомӧс. Бать-мамыс сыысь вӧчалӧны быдсяма чачаяс – вӧлӧс да кора додьяс, мӧскӧс, кукӧс, порсьӧс, сюра межӧс, петукӧс. Тайӧ пӧжассӧ шуӧны «чибиӧн». Фигураяссӧ пӧжалӧны пачын, асывнас сетӧны челядьлы ворсны. Челядь ворсӧны Ва вежӧдан лунӧдз, сэсся сёйӧны чибисӧ.

Мукӧд чибиыс бедь йылын. Пӧжалӧм бӧрын дзик пыр кӧзяйка петкӧдӧ найӧс анбарӧ да сувтӧдӧ нянь тусь пытшкӧ.

Ӧшмӧс[веськӧдны | править код]

Коми календар. 2009 во / Дасьтіс Ӧльӧш Рассыхаев. Сыктывкар, 2008.