Истомин Иван Григорьевич

Истомин Иван Григорьевич
Чужан лун:	1917-ӧд вося урасьӧм тӧлысь 7-ӧд лун(1917-02-07)
Чужанін:	Мыжы, Ямал-Яран асвеськӧдлан кытш, Уральская область[d], РСФСР[d]
Кулан кад:	1988-ӧд вося сора тӧлысь 27-ӧд лун(1988-07-27) (71 ар)
Канму:	Россияса империя  Сӧветскӧй Социалистическӧй Республикаяслӧн Союз
Мыйся уджыс:	гижысь, поэт
Ошканпасъяс да премияяс:
Истомин Иван Григорьевич на Викискладе

Истомин Иван Григорьевич (Сибырак Иван; 1917—1988) — коми да яран гижысь, драматург, серпасалысь. Сійӧс шуӧны Ямалса Войвывсӧ медводдза сьылӧдысьӧн да яран литературалы подув пуктысьӧн.

Олан туй

Иван Истомин чужис 1917 вося урасьӧм тӧлысь 7-ӧд лунӧ Тобольск губерняса Мыжыын (ӧні Тюмень обласьтысь Ямал-Яран асвеськӧдлан кытшса Мыжы сикт) чери кыйысь коми семьяын.

Сылӧн челядьдырыс колис Ичӧт Об ю горулын, кӧні орччӧн олӧны казымса хантъяс, манси, яранъяс, комияс да рочьяс. Куим арӧсӧн Иван ёна висьмис, нэм кежлӧ коли инвалидӧн, ӧкмыс арӧсӧн сувтіс кӧстыль вылӧ. 1934 воын помаліс Мыжыын 7 вося школа, вуджис Салехардӧ. Вит вылӧ помаліс 1938 воын национальнӧй педагогическӧй училишӧ. Педучилишӧын водзмӧстчис да мукӧдыскӧд ӧтвылысь лӧсьӧдіс литературнӧй кружок да кипомысь «Ямал тату» («Ямаллӧн бикиньяс») журнал.

Дас кык во И.Г. Истомин велӧдіс роч да яран кывъяс, серпасасьӧм школаясын. 1950 воын Ямал-Яран кытшса КПСС-лӧн комитет вуджӧдіс сійӧс «Нарьяна Нгэрм» («Гӧрд Войвыв») кытшса газет редакцияӧ редакторӧс вежысьӧн (вуджӧдіс яран кывйӧ роч гижӧдъяссӧ).

Куліс 1988 вося сора тӧлысь 27-ӧд лунӧ.

Гижан удж

«Олень» медводдза кывбурсӧ Иван Истомин йӧзӧдіс Ямал-Яран кытшса газетын 1936 вося рака тӧлысьӧ. Сэксянь кывбур да висьтъясыс, очерк да публицистика гижӧдъясыс петавлісны кытшса да Тюмень обласьтса газетъясын, «Омский альманах», «Сибирские огни», «Дружба народов», «Урал» да «Нева» журналъясын, «Войвыв кодзув» журналын, «Полярный круг» альманахын да мукӧдлан.

1958 вося ӧшым тӧлысьӧ вуджӧ овны Тюменьӧ да уджалӧ Тюмень небӧг лэдзанінын медшӧр редакторӧс вежысьӧн (уджыслӧн нырвизь — национальнӧй литератураяс). 1965 восянь — гижан уджын.

Иван Истоминлӧн медводдза небӧгыс — яран кывйӧн «Миян Войвыв» кывбур чукӧр — йӧзӧдӧма 1953 воын Ленинградын. Тюмень, Шӧр Урал, «Современник», «Советский писатель», «Художественная литература» небӧг лэдзанінъясын петавліс И.Г. Истоминлӧн кызь сайӧ небӧг — повесьтъяс, висьтъяс, кывбуръяс яран да роч кывъяс вылын, «Живун» да «Встань-трава» романъяс.

Иван Истомин бура тӧдіс ӧтпырйӧ некымын кыв, кодъяс вылын и гижис: роч, яран, ханты да коми кывъяс. Истомин вуджӧдавліс рочсянь яран да коми кывъяс вылӧ. Сылӧн уна кывбур вылӧ гижӧма сьыланкыв.

1963 воын Тюменьса театрын пуктісны роч кыв вылӧ вуджӧдӧмӧн сылысь «Цветы на снегу» драма. Уналы тӧдса роч гижысь Леонид Жариков пасйис: «Истомин — поэт высокого плана, независимо от того, пишет он стихи, пьесы или прозаические произведения... Отличное знание обычаев, поверий, легенд, неповторимого песенного богатства помогло ему стать певцом народа... со своим самобытным почерком».

Та кындзи Иван Истомин серпасасьӧ. Сылӧн кык серпас («Арест легендарного вождя ненецко-хантыйской бедноты Ваули Пиеттомина» да «Ленин на Ямале») эм Салехардса краеведческӧй музейын.

Велӧдан да гижан уджысь Иван Истоминлы сетӧма «Почёт Пас» орден, «За трудовую доблесть» медаль.

1955 восянь И.Г. Истомин пырӧ СССР-са гижысь котырӧ.

Наградаяс

• «Почёт Пас» орден
• «Уджалан доблесьтысь» медаль

Ӧшмӧсъяс

• Истомин Иван Григорьевич
• Писатели Ямала
• Писатели Тюменской области: Библиографический указатель. — Свердловск: Сред.-Урал. кн.изд-во, 1988. — 112с.
• Лукоморье. Литературная хрестоматия: Книга для учащихся 5-7 кл. — Тюмень: «СофтДизайн», 1997. — С. 312.
• Литература Тюменского края. Хрестоматия в трех книгах: Кн.3. 10-11 кл. / Сост. Г.И. Данилина, Е.А. Рогачева, Е.Н. Эртнер. — Тюмень: «СофтДизайн», 1996. — С. 344-345.
• Афанасьев Ю., Афанасьева Н. // Истомин И.Г. Живун: Роман, повесть, рассказы. Т.1 / Предисл. Афанасьева Ю.Н. — Екатеринбург: Сред.-Урал. кн. изд-во, 1997. — С. 3.