Вежова Октябрина Михайловна

Вежова Октябрина Михайловна
Чужан лун:	1932-ӧд вося урасьӧм тӧлысь 7-ӧд лун(1932-02-07)
Чужанін:	Кулӧмдін район, Коми Республика, РСФСР[d], Сӧветскӧй Социалистическӧй Республикаяслӧн Союз
Кулан кад:	2011-ӧд вося урасьӧм тӧлысь 6-ӧд лун(2011-02-06) (78 арӧс)
Канму:	Сӧветскӧй Социалистическӧй Республикаяслӧн Союз  Рочму
Ошканпасъяс да премияяс:

Вежова Октябрина Михайловна (1932—2011) — Социалистическӧй Уджвывса герой, видз-му овмӧсын уджалысь. Нывдырся овыс — Игнатова.

Олан туй

Октябрина Вежова чужӧма 1932-ӧд вося урасьӧм тӧлысь 7-ӧд лунӧ Коми АССР-ын Кулӧмдін районса Помӧсдін сиктын.

1951-ӧд воын воӧма Сыктывкарӧ да пырӧма велӧдчыны Педучилищеӧ физкультурнӧй юкӧнӧ. Во велӧдчӧм бӧрын ковмӧма эновтчыны, сы вӧсна мый некодсянь виччысьны отсӧгсӧ. 1954-ӧд воын С. Киров нима колхоз мӧдӧдӧма сійӧс Сыктывкарса видз-му техникумӧ, быд тӧлысь кӧсйысьӧма отсавны 100 шайтӧн. Стипендиясӧ сетӧмаӧсь 200 шайт, и вермӧма велӧдчыны, помалӧма 1957-ӧд воын «Агроном» специальносьт серти.

1957—1989-ӧд воясын уджалӧма «Сыктывкар» совхозлӧн Кӧджпонса юкӧнын овощъяс быдтан бригадаын веськӧдлысьӧн. Бригадаыс быд во вевтыртӧма вылісянь лэдзӧм планъяс, сетӧма картупельлысь ыджыд урожай (300-315 ц/га). Медбур урожайыс — гаысь 425 центнер. Социалистическӧй Уджвывса герой ним сетӧма 9-ӧд пятилеткалысь планъяссӧ олӧмӧ бура пӧртӧмысь.

Кулӧма 2011-ӧд вося урасьӧм тӧлысь 6-ӧд лунӧ.

Ошканпасъяс

• «Доблестнӧй уджысь (Воинскӧй доблесьтысь). В. И. Ленин чужӧмсянь 100 во тыриг кежлӧ» юбилейнӧй медаль (1970)
• Уджвывса Гӧрд Дӧрапас орден (1971)
• Социалистическӧй Уджвывса герой (1976)
• Коми АССР-са народнӧй овмӧсын нимӧдана уджалысь

Ӧшмӧсъяс

• Максимова Л. Вежова Октябрина Михайловна // Республика Коми: Энциклопедия: в 3-х т. — Сыктывкар, 1997. — Т. 1. — С. 289.