Черань
Черань (латин Aranei) — йитлӧм кока гагъяслӧн котырысь пемӧсыс.
Оласног да паськалӧм
[вежны | Вежны кодировкаын]Олӧны Му сяр пасьтала, Россияын налӧн 2300 сикас. Ставныс найӧ, ва чераньысь ӧтдор, косӧдінса ловъяс. Медся ичӧтъясыс сантиметрысь на посниджыкӧсь, гырысьджыкъясыс овлӧны 11 сантиметрӧдз. Чераньяс пиысь кодсюрӧыс (шуам, кузь кока черань) шӧйтӧны-ветлӧдлӧны местаысь местаӧ, мукӧдыс (везъяс кыысьяс) нэмсӧ коллялӧны пыр ӧтилаын. Вывтырыс чераньлӧн кык юкӧна: юра морӧс да кынӧм, кодъяс костын эм вӧсньыдик за кодь йитӧд. Юра морӧсыслӧн вылысладорыс чорыд кыша. Водзладорас 8 син. Кокыс — квайт гоз. На пиысь воддза кыкыс сы могысь, медым бытшкыны кыйдӧссӧ да лэдзны пагӧдан дульсӧ, а сідзжӧ дорйысьны вӧрӧгъясысь. Мӧд кыкыс йигӧралан да сёянсӧ нёнялан кокъяс. Пельыс абу да, шыяссӧ кывзӧ тайӧ жӧ кокса вӧсньыдик сіясӧн. Мукӧд нёль гозйыс — ветлӧдлан кокъяс. Кынӧмыс кузьмӧс либо гӧгрӧс, сэні чераньлӧн абу сӧмын сювйыс, а тшӧтш и сьӧлӧмыс да тыыс, бӧрладорас везсӧ лэдзан нерӧдъясыс.
Быдсикас чераньлӧн айыс да эньыс торъялӧны ыджданас, эньловъясыс гырысьджыкӧсь айяссьыс. Рӧдмӧдчӧны чераньяс колькъяс отсӧгӧн, кодъясӧс асланыс везйӧн гартӧны-тӧбӧны, а сэсся пуктӧны пу потас костӧ, кырсь улӧ либӧ новлӧдлӧны сьӧрсьыс чераньпияныс петтӧдз. Черань — войын олысь да кыйсьысь пемӧс.
Черань сикасъяс
[вежны | Вежны кодировкаын]Коми муын олӧны сэтшӧм чераньяс:
Кыв артмӧм
[вежны | Вежны кодировкаын]Черань — зэв важся ним, кодӧс лӧсьӧдлӧмаӧсь важ перымса ӧтувъя кывйын на. Перымса комияс тшӧтш шуӧны чераньӧн. Удмуртъяслӧн чонари. Туялысьяслӧн чайтӧм серти, татшӧм торъялӧмыс лоӧма кодаркӧ кывъяслӧн местананыс вежсьӧм понда.
Ӧшмӧсъяс
[вежны | Вежны кодировкаын]- Ракин А. Вӧр-васа олысьяс. — Сыктывкар: Анбур. — 2017. — 208-209 лб.