Чувьюрова Ирина Ивановна

Босьтӧма Wikipediaысь
(водзӧ ыстӧма «Уляшова Ирина Ивановна»ысь)
Чувьюрова Ирина Ивановна

Шаблон:Серпасыс абу

Чувьюрова Ирина Ивановна (1971) — коми шылад тэчысь.

Олан туй[вежны | Вежны кодировкаын]

Ирина Чувьюрова чужӧма 1971-ӧд вося лӧддза-номъя тӧлысь 26-ӧд лунӧ Коми АССР-ын Печора районса Соколов сиктын. 1992-ӧд воын помалӧма Сыктывкарса педагогика колледж, лоӧма подув классъяс велӧдысьӧн, да В. Т. Чисталёв нима Коми Республикаса культура колледж. 1997-ӧд восянь уджалӧ Сыктывдін районса культура керкаын хормейстерӧн. Олӧ да уджалӧ Выльгорт сиктын.

Шылад тэчӧм[вежны | Вежны кодировкаын]

И. И. Чувьюрова гижӧ кывбуръяс да ачыс жӧ дасьтӧ на дорӧ шыладсӧ. Гижӧма уна коми сьыланкыв, кодъясӧс сьылӧны профессиональнӧй да асшӧр сьылысьяс да котыръяс: «Зӧнзӧвӧй» хор, Коми Республикаса культура колледжлӧн «Пелысь мольяс», «Сигудӧк», «Асъя кыа» и с.в, Лидия Логинова, Виктория Пыстина, Наталья Канова.

Быд во петкӧдчӧ асшӧр шылад тэчысьяслӧн «Василей» республикаса конкурс-гажын, тшӧкыда сьыланкывъясыс шедӧдӧны бур местаяс: «Чужан керка» (2010, торъя козин ютырсянь), «Коми му» (2012, торъя козин), «Гын сапӧг» (2013, видзӧдысьяссянь козин), «Менам чужан муӧй» (2014, 3 места), «Самӧвар» (2017, 2 места).

Йӧзкостса сьыланкыв сьылысьяслӧн «Завалинка» ставроссияса фестиваль кежлӧ гижӧма «Играй, гармонь!» сьыланкыв (сьылӧма «Зӧнзӧвӧй» хор, кывъясыс И. И. Уляшовалӧн жӧ).

Сьыланкывъясыс пырӧмаӧсь некымын дискӧ: «Кор волӧ тулыс» (2009) — асшӧр диск. Ирина Чувьюрова кывъяс вылӧ да «Потешки» челядь ансамбльӧн сьылӧм сьыланкывъясыс веськалісны челядьлы «Лукошечко счастья» (2011) да челядь видзанінъяслы «Дзолюкъяс» (2013) дискъясӧ (лэдзӧма Коми Республикаса йӧзӧс велӧдан министерство). Пырисны сылӧн сьыланкывъясыс и караоке-дискӧ, мый дасьтӧма 2015-ӧд воын Коми Республикаса национальнӧй политика министерство.

Веськӧдлӧ «Зӧнзӧвӧй» да «Шуда кад» йӧзкостса хоръясӧн. 2016-ӧд воын лӧсьӧдӧма челядьлысь «Эзысь шор» фольклор котыр. Челядьлы коми сьыланкывъяса «Сьыланкывкӧд коля» да «Василёк» республикаса фестивальясын сьылысь котырыс шедӧдӧма мӧд местаяс.

Общественнӧй удж[вежны | Вежны кодировкаын]

Веськӧдлӧ инвалидъяслӧн ставроссияса котырысь Сыктывдін районса чукӧрӧн. Водзмӧстчӧ «Коми войтыр» ӧтмунӧмын.

Наградаяс[вежны | Вежны кодировкаын]

  • Коми Республикаса Почёта грамота (2012)
  • Сыктывдін районса Почёта гражданин (2019)

Öшмöсъяc[вежны | Вежны кодировкаын]

Ыстӧдъяс[вежны | Вежны кодировкаын]