Терентьев Фёдор Александрович

Терентьев Фёдор Александрович

Терентьев Фёдор Александрович (1891—1984) — туялысь, ветеринария наукаясса доктор, РСФСР-са наукаясын нимӧдана уджалысь.

Олан туй

Фёдор Терентьев чужӧма 1891-ӧд вося урасьӧм тӧлысь 19-ӧд лунӧ Изьва районса Краснобор сиктын.

1911-ӧд воын Кардорса ветеринарно-фельдшерскӧй школа помалӧм бӧрын сійӧс индісны Краснобор вӧлӧсьтса ветпунктӧ веськӧдлысьӧн. Гӧрд армияӧ борсьтӧм бӧрын служитӧма ветлазаретын.

1921—1925-ӧд воясӧ студенталӧма видз-му овмӧс наукаяяса академияын. Каникулъяс дырйи олӧма озыра олысь кӧр видзысь бать-мамыс дорын тундраын, кӧні туялӧма кӧръяслысь висьӧмъяс, чукӧртӧма турунъяс.

1921-ӧд воын, кор Ф. А. Терентьев вӧлӧма студентӧн Москваса ветинститутын, сёрнитӧма докладӧн РСФСР-са Наркомземлӧн Шӧр ветеринарнӧй управленньӧса коллегия вылын, темаыс — Коми обласьтын кӧр видзӧм йылысь да вӧзйӧма пистиавны кӧръясӧс. Докладӧ вӧлі вынсьӧдӧма, вичмӧдӧма медицинаса уджалысьясӧс да сьӧм кӧр висьӧмъясӧн тышкасьӧм могысь. 1924-ӧд воын Совнарком шуис восьтыны Изьваын Печораса ветеринарно-бактериологическӧй института. Медводдза кадас институтӧн веськӧдлӧма профессор Т. М. Мануйлов, сылӧн мунӧм бӧрас директорӧн вӧлі индӧма Ф. А. Терентьев.

1925—1931-ӧд воясӧ веськӧдлӧма ветеринарно-эпизоологическӧй отрядӧн, кодӧс вӧлі восьтӧма сӧмын на лӧсьӧдӧм Печораса (Изьваса) ветбакинститутын. Отрядъяыс некымын тӧлысь чӧж олісны тундраын кӧр дорын, туясисны да нуӧдісны вакцинация. 1927-ӧд воын Терентьев дасьтіс институтлӧн медводдза воясӧ уджалӧм йылысь отчёт, висьталіс вакцинациялӧн выль метод йылысь. Сылӧн удж отсӧгӧн вӧлі корсьӧма колана вакцина кӧръяслӧн медлёк висьӧмъяслы паныд — сибирса язва да ящурлы паныд, вежӧма вакцинация методика, мый сетіс позянлун ӧдйӧ чинтыны кӧр юр воштӧм. Вакцина вермис век кежлӧ сувтӧдны кӧр усьӧм. Вакцина дасьтӧмысь Фёдор Терентьевлы сетӧма Уджвывса Гӧрд Дӧрапас орден. Тайӧ опытсӧ босьтісны мукӧд странаса туялысьяс — АӦШ, Канада да Финляндия.

1931-ӧд восянь уджалӧма Москваын ветеринарнӧй санитарияса стасоюзса туясян институтын, кӧні уджалӧма 20 сайӧ во. Велӧдӧма Яй да йӧв промышленносьтлӧн москваса технологическӧй институтын.

Кулӧма 1984-ӧд вося моз тӧлысь 19-ӧд лунӧ Москваын.

Туясян удж

Гижӧма 100 сайӧ туясян удж, на лыдын «Сибирская язва и меры борьбы с ней» небӧг, вӧлі йӧзӧдӧма АӦШ-ын, Канада-ын да Финляндияын.

1935-ӧд воын Ф. Терентьевлы сетӧма ветеринарнӧй наукаясса доктор ним, 1940-ӧд воын — профессор туясян звание, а РСФСР-cа Вылыс Сӧветлӧн Президиумысь 1963-ӧд вося косму тӧлысь 10-ӧд лунӧ йӧзӧдӧм шуӧмӧн — «РСФСР-са наукаясын нимӧдана уджалысь» ним.

Ошканпасъяс

• Уджвывса Гӧрд Дӧрапас орден
• РСФСР-са наукаясын нимӧдана уджалысь (1963)

Небӧгъяс

• Сибирская язва животных и борьба с ней / Глав. ветеренар. упр. Министерства животноводства СССР. — Москва: Сельхозгиз, 1946 (Образцовая тип.). — 63 с.
• Болезни овец: [сборник статей] / под ред. Ф. А. Терентьева [и др.]. — [2-е изд., доп. и перераб.]. — Москва: Сельхозиздат, 1963. — 520 с.

Ӧшмӧсъяс

• Коми Республикаса Вужвойтырлӧн небӧгаин
• Хатанзейский Н. Главный санитар тундры // Люди Ижемского края. — Ижма, 2014. — С. 79—81.