Мыс сиктса школа

Материал из Wikipedia
Перейти к навигации Перейти к поиску

Мыс сиктса школаКулӧмдін районса Мыс сиктысь велӧдчанін. 2013 восянь шусьӧ «Ичӧт школа-челядьӧс видзанін» Мыс сиктса муниципальнӧй велӧдан учреждение. Ассьыс историясӧ панӧ 1887 восянь.

История[веськӧдны | править код]

Мыс сиктын медводдза школа воссис 1887 воын. Тайӧ вӧлі вичкобердса школа, кӧні велӧдчисны 5 зон да 1 ныв. Мӧд воас школаын лыддьыссис нин 13 зон да 3 нывка. Медшӧрсӧ велӧдісны Енлысь оланпас (Закон Божий), лыддьыссьӧм, гижӧд да артасьӧм. Торъя стрӧйба эз вӧв, велӧдчисны купеч Андрей Егорович Паршуковлӧн ӧти жырйын. Медводдза велӧдчысьяснас вӧліны озыр крестьяналӧн челядь. Велӧдіс найӧс Трубачёв Михаил Трифелевич.

1903-1904 велӧдчан во кежлӧ стрӧитісны торъя стрӧйба, сулаліс сійӧ сикт шӧрын вичко дорын. Шусис «Куим класса вичкобердса школа». 1910 во кежлӧ содіс нӧшта ӧти класс и школаыс кутіс шусьыны «Нёль класса вичкобердса школа». Медводдза велӧдысьяснас тайӧ школаясас вӧліны Александр Васильевич да Анна Ивановна Георгиевскийяс гозъя, Маегова Текуса Максимовна. Текуса Максимовнаӧс арестуйтісны 1907 воын позьтӧм брошюраяс видзӧмысь, дзескыдінын сійӧ пукаліс 1917 воӧдз.

1918 восянь вичкобердса школа кутіс шусьыны Медводдза тшупӧда Мысса начальнӧй школаӧн. Школаын велӧдісны Немдін сиктысь Тимушев Константин Иванович, Парч сиктысь Напалкова Надежда Фёдоровна, поплӧн гӧтыр Ермолина Мария Ивановна да Пименов Григорий Максимович. Быд классын вӧлі 15-17 велӧдчысь. Унаӧн школа помалӧм бӧрын велӧдчисны Немдін сиктын.

1937-1938 велӧдчан воын начальнӧй школасӧ вежисны нетыр шӧр школаӧ. Выль велӧдчан во кежлӧ стрӧитісны 180 места вылӧ выль ӧти судтаа школа. Выль школаын вӧлі ставыс - ыджыд классъяс, бур спортзал, физическӧй кабинет, библиотека. 5 классын кутісны велӧдчыны весиг ыджыдджык арлыда челядь – 13-14 арӧса. Выль школаын директорӧн лои Новиков Михаил Иванович. 1938 вося тӧлын уборщица вӧсна школаыс сотчис. Челядьӧс кутісны велӧдны важ начальнӧй школаын, сельсӧветын, больничаын.

1943-1944 велӧдчан во кежлӧ стрӧитісны 180 места вылӧ выль кык судтаа школа. Школасӧ стрӧитісны нюраинын. Канму комиссия школасӧ эз примит. 1952 вося тулысын вӧлі ыджыд ва да школаыс (медводдза судталӧн джынйыс) ойдіс ваӧн. Школаӧ пырисны пыж вылын медводдза судтаса ӧшинь пыр. Школаыс вежыньтчис, пачьяс киссисны, РОНО тшӧктіс вуджӧдны стрӧйбасӧ выліджык местаӧ. 1953 вося гожӧмсянь заводитчис школа вуджӧдӧм, стрӧитӧмыс помасис 1957 воын. Та кадӧ (1953-1957 вояс) челядь велӧдчисны 8 крестьяна керкаын.

1964-1965 велӧдчан во кежлӧ вестибюльысь лӧсьӧдісны жыр 8 класслы.

2013 воын «Öкмыс класса школа» Мыс сиктса муниципальнöй велöдан учреждение да «Мысса челядьӧс видзанін» школаӧдз велӧдан муниципальнӧй учреждение выль ног котыртісны «Ичӧт школа-челядьӧс видзанін» Мыс сиктса муниципальнӧй велӧдан учреждение.

Директоръяс[веськӧдны | править код]

Ӧшмӧсъяс[веськӧдны | править код]

Ыстӧдъяс[веськӧдны | править код]