Пинькай

Материал из Wikipedia

Пинькай (латин Fringilla montifringilla, рочӧн юрок, вьюрок) – вöрса лэбач, неуна ыджыдджык пышкайысь.

Ыджда[веськӧдны]

Кузьтаыс 14-18 сантиметр, сьöктанас овлывлö 25 граммöдз.

Рöм[веськӧдны]

Юрыс, сьылiыс, мышкуыс да борд шöрыс югъялана сьöд рöма. Морöс улысладорыс, туша бокыс, кынöмыс, бöж вевдорыс еджыд. Морöс вылысладорыс, бöж йывъясыс гöрдов. Ён нырыс да синмыс сьöдов, кокыс рудов.

Паськалöм[веськӧдны]

Паныдасьлö вöра местаясын Скандинавия муяссянь Камчаткаöдз. Миянын олö парма пасьтала. Поздысьö Печора ковтысын тундраöдз, а сiдзжö Войвыв Уралын, Удораын, Эжва катыдын, Летка ю вожын да мукöдлаын.

Оланін да поздйысьöм[веськӧдны]

Радейтö васöд ньыв пуа-козъяинъяс. Позъяснысö пинькайяс век тэчöны кыдз, коз, пожӧм да мукöд сикас пу вылö, мусяньыс нёль-ö-вит метр вылнаö. Найö гöгрöс сяр кодьöсь, кодлöн вылысладорыс джынвыйöдзыс восьса. Пöжны пуктöны вит-ö-квайт посньыдик кольк. Рöмыс налöн вижов вевъя, ичöтик чутъясöн серöдöма. Борд йылö кыпöдчöм да верстяммыштöм бöрын пинькайпиян öтвывтчöны кельӧбъясö да дыр на лэбалöны чужанiн гöгöртас вӧръясын.

Сёян[веськӧдны]

Кынöмпöтсö пинькайяс перйöны быдмӧгъяс помысь, кокалöны налысь туся кӧйдыссö. Гожӧмнас чöсмасьöны тшöтш и гут-гагйöн.

Тöвйöм[веськӧдны]

Кӧч тӧлысьын пинькайяс гырысь кельöбъясöн вешйöны миянысь лунвыв да рытыв-лунвывланьö. Сэсся йирым тöлысь шöрын воöдчöны асланыс быдвося тöвъянiнъясöдз – Лунвыв Европаöдз. А налöн Сибырын гожйысь чой-вокыс тӧвсö коллявны лэбзьöны Гималай гöраясöдз.

Гортын видзöм[веськӧдны]

Кыдзи висьталöны лэбачьяслысь олöм-вылöмсö бура тöдысьяс, пинькайяс оз туйны гортын видзöм вылö. Найö зэв полысьöсь, öтдортöны йöзöс да оз сетчыны мевйöдны. Нöшта и сьыланногыс пö тайö кайясыслöн абу зэв мича.

Рöдвуж кыв вылын[веськӧдны]

Перымса комияс тылабордасö миян моз жö шуöны пинькайöн. Кыдзи аддзам, важ коми йöз нимсö сетiгöн мыджсьöмаöсь сылöн чуксасян шыясыслöн аслыспöлöслун вылö. Удмуртъяслöн кывворын татшöм нимыс абу. Найö шуöны лэбачсö ас ногыс: тэль куака, мый лоö, комиöдны кö, вöрса рака.

Художествоа гижöдын[веськӧдны]

«Пинь-пинь... пинь-пинь!..» – кытöнкö коз йылын, кылö, тешкöдчö-пинясьö кöдзыдкöд пинькай, коль гылöдiгтырйи. Тадзи гижö Тима Вень 1919 вося дженьыдик «Во гöгöр кытшовтöм» висьтын, кöнi сёрниыс мунö войвывса лэбачьяслöн сьылöм да чуксасьöм йылысь.

Öшмöс[веськӧдны]