Кӧрткерӧсса школа
Кӧрткерӧсса школа — Коми Республикаса Кӧрткерӧс сиктса школа, коді панӧ ассьыс историясӧ 1843 восянь.
История[вежны | Вежны кодировкаын]
Кӧрткерӧс сиктса шӧ школа — Коми муын медваж лыдын. Сійӧс восьтісны 1843 воын Стефан Попов поплӧн водзмӧстчӧмӧн. Сійӧ велӧдіс ас керкаас кресьтянаяслысь пиянсӧ да вичкоса уджалысьяслысь челядьсӧ. Школаын велӧдісны арифметика, роч грамматика, военнӧй гимнастику, вичко проповедьяс.
1845 воын керкасӧ сетісны йӧзкостса велӧдӧм министерстволы. Школаса медводдза велӧдысьясӧн вӧліны Анна Вишеславова, Нонна Егоровна Попова, Арсентий Константинович Коплин (велӧдіс «Закон Божий»). 1915—1920 воясӧ тані уджаліс Агния Суханова — нималана общественнӧй удж вӧчысь, коми кыв вылын челядьлы медводдза небӧгъяс лӧсьӧдысь.
Школалӧн статусыс вежласис. 1939—1940 велӧдчан воӧ сійӧ лои шӧр школаӧн, лоины выль жыръяс: физика-математика да химия-биология.
Айму вӧсна Ыджыд тыш бӧрын школалӧн материальнӧй базаыс бурмыштіс, но челядьыс велӧдчисны куим торъя керкаын. Сӧмын 1960-ӧд вояс пансигӧн вӧлі кыпӧдӧма кык судтаа выль школа, кӧть эськӧ сэтчӧ эз жӧ ставныс тӧрны. 1978 воын кыпаліс школалӧн выль здание, кӧні вӧліны: тыр-бура оборудуйтӧм велӧдчан жыръяс, мастерскӧйяс, актӧвӧй да спорт, сёянін, небӧг видзанін да мукӧдтор.
1977 восянь школаса велӧдысьяс пырӧдчӧны «Учитель года» районса конкурсӧ. Вермысьясӧн вӧліны: Е.В. Рябинина, В.И. Старцева, Т.Н. Вишератина, Н.С. Решетихина, Т.Г. Киселёва, Е.В. Мингелене, Э.А. Стахиева, И.А. Попова, Е.В. Степанова, И.А. Ракова, Л.Н. Игнатова, Т.М. Казакова.
2013 во вылӧ Кӧрткерӧсса школаын уджалісны 101 морт, на лыдын — 69 велӧдысь; велӧдчисны 637 морт. Школаын директоралӧ В.В. Ульянова.
Школа нимӧдысьяс[вежны | Вежны кодировкаын]
- Дмитрий Гуляев — боксысь россияса призёр
- Евгений Вишератин — единоборствоясысь Коми Республикаса призёр
- Татьяна Кынева — ориентированиеысь Коми Республикаса призёр
- Иван Мяндин — биатлонысь спорт мастер, лызьӧн котралӧмын спорт мастерӧ кандидат, лызьӧн котралӧмын Коми Республикаса чемпион.