Лыткин Леонид Александрович

Лыткин Леонид Александрович (1930) — коми гижысь да журналист.

Олан туй

• 1930, сора тӧлысь 31 лун — чужис Сыктывкарын.
• Велӧдчис Олег Кошевой нима Сыктывкарса 12 №-а школаын. 8 класс помалӧм бӧрын пырис велӧдчыны республикаса Драма театр бердын театральнӧй студияӧ. Шӧр образование босьтіс 21-ӧд №-а рытъя школаын. Велӧдчис Ленинградса видз-му институтын.
• 1949 — Уджаліс «Вӧрлэдзысь» газетын литературнӧй сотрудникӧн.
• Служитіс Сӧветскӧй Армияын. 1954 воын бергӧдчис уджавны «Вӧрлэдзысь» газетӧ.
• 1955 — Л.Лыткинӧс бӧрйисны Летка райкомын ВЛКСМ-са медводдза секретарӧн. Вит кымын во уджаліс комсомолын.
• 1958—1959 — Вӧлі «Молодёжь Севера» газетын редакторӧс вежысьӧн. Мыйтакӧ уджыштіс «Красное знамя» республикаса газетын сиктса олӧм юкӧдын веськӧдлысьӧн.
• 24 во уджаліс Коми АССР-са телевидение да радиовещаниеысь канму комитетын редакторӧн, а сэсся медыджыд редакторӧн.

Гижан удж

«Видз вылын талун шондіа» медводдза висьтсӧ йӧзӧдіс 1940 воын «Коми комсомолец» газетын. Сылӧн висьтъясыс петавлісны «За коммунизм» районкостса газетын. «Гӧрд пӧлян» радиожурналын унаысь юргисны сылӧн дженьыд да шмонитана гижӧдторъяс. Йӧзӧдчис «Земля родная» (Москва), «Войвыв кодзув», «Чушканзі» да «Би кинь» журналъясын. Гижӧдъясыс веськалісны «Миян грездса челядь» да «Шувгӧны пожӧмъяс» висьтъяса ӧтувъя чукӧръясын. Леонид Лыткин йӧзӧдіс очеркъяса кык небӧг, «Чулькъяс» повесьт, кодлӧн юкӧнъясыс петавлісны «Войвыв кодзув».

Общественнӧй удж

Веськӧдлӧма «Сыктывкар» нима историко-мемориальнӧй да культурно-просветительскӧй обшественнӧй котырӧн.

Небӧгъяс

• Лыткин Л.А. Город белых ночей Сыктывкар. — Сыктывкар: Изд-во «Кола», 2010. — 199 с. (1000 экз.)

Наградаяс

• Коми Республикаса нимӧдана уджалысь (2010, сора тӧлысь 1 лун).

Ӧшмӧсъяс

• Жеребцова Н. Летописец республики // «Красное знамя» газет, 2010. Сора тӧлысь 8-ӧд лун.