Нӧдкыв

Нӧдкыв (роч кыв: Загадка) – афоризм нога фольклор жанр. Нӧдкыв лоӧ финн-йӧгра фольклор традицияын медваж жанръяс пиысь ӧтиӧн. Сійӧ вӧлі культӧвӧй обряд юкӧнӧн да вежа (сакральнӧй) тӧдӧмлунъяс сетысьӧн. Ӧнія кадӧ нӧдкывйӧн ёнджыка вӧдитчӧны челядьлысь сюсьлун да поэтическӧй видзӧдлас сӧвмӧдӧм могысь.

Нӧдкыв сикасалӧм

Тэчас сертиыс позьӧ торйӧдны некымын нӧдкыв сикас:

• нӧдкыв-юалӧм: Мый тув йылӧ оз ӧшйы? (Кольк);
• нӧдкыв-диалог: Чикыли-мукыли, кытчӧ мунан? – Чӧӧ, вежӧм урӧс, асьтӧ лӧсалӧны и гогналӧны (Ю да берег);
• нӧдкыв-метафора: Ӧти шыр да кык бӧж (Кӧті).

Коми нӧдкывлӧн терминъяс

Коми фольклорын «нӧдкывлӧн» паныдасьлӧны татшӧм йӧзкостса терминъяс: нӧданкыв, нӧдасянкыв, няръянкыв, тӧдӧдчанкыв.

Коми нӧдкывъяс серти небӧгъяс

Нӧдкывъяс чукӧртӧмын да туялӧмын медыджыд пай Ф.В. Плесовскийлӧн. Сылӧн петавліс «Коми нӧдкывъяс. Коми народные загадки» небӧг (1975).Тайӧ удж вылас мыджсьӧмӧн 2008 воын коми нӧдкывъяс чукӧр йӧзӧдіс В.М. Кудряшова: «Загадки народа коми» (2008). Бӧръя кадас коми нӧдкывъяс туялӧ С.Г. Низовцева, кодлӧн петавліс некымын статья тайӧ тема сертиыс.

Гижӧд чукӧръяс

• Коми нӧдкывъяс. Коми народные загадки / Лӧсьӧдіс Ф.В. Плесовский. – Сыктывкар: Коми кн. изд-во, 1975. – 112 с.
• Загадки народа коми / Сост., вступ. ст. В.М. Кудряшовой. – Сыктывкар, 2008.

Ӧшмӧсъяс

• Коми фольклор: Хрестоматия / Лӧсьӧдісны да водзкывъяссӧ дасьтісны В.В. Филиппова, Н.С. Коровина. – Сыктывкар: Коми кн. изд-во, 2002. – Л.б. 238–242.