Щербаков Иван Александрович

Щербаков Иван Александрович (1922—1942) — лызьӧн нималана котралысь, лыжиӧн котралӧмысь Коми АССР-са чемпион (1941).

Олан туй

Гижӧма комиӧн кывбуръяс, сьылӧма. Помалӧма Железнодорожнӧй посёлокын школа. Быд лун ветлӧдлӧма школаӧдзыс лыжиӧн Туръясянь, ӧтарӧ-мӧдарӧ — 80 км.

Лыжиӧн 30 км котӧртігӧн 1941-ӧд воын лоӧма Коми АССР-са чемпионӧн.

Айму вӧсна Ыджыд тыш вылӧ босьтӧма Железнодорожнӧй райвоенкомат 1941-ӧд вося лӧддза-номъя тӧлысь 28-ӧд лунӧ. Велӧдчӧма Ленинградса военнӧй училишӧын. Айму вӧсна Ыджыд тыш дырйи вӧлӧма стрелок-радистӧн, танкистӧн. Служитӧма 14-ӧд армияса 107 танкӧвӧй батальонын. Усьӧма 1942-ӧд вося моз тӧлысь 27-ӧд лунӧ Ленинград дорйигӧн. Гуалӧма Ленинград обласьтса Киров районын Путиловскӧй сикт сӧветувса Назия кӧрт туй станциясянь неылын (войвывладорас, Мга — Волховстрой визьын).^[1]

Княжпогост районса сӧвет 1974-ӧд воын шуӧма быд во нуӧдны Иван Щербаков нима лызьӧн котралысьяслысь ордйысьӧм.