Шомысов Василий Алексеевич

Шомысов Василий Алексеевич

Шомысов Василий Алексеевич (Ӧльӧ Вась, 1893—1981) — сигудӧк вӧчалысь да сигудӧкӧн ворсысь. Медводдза ставмирса тыш вылӧ ветлысь.

Олан туй

Василий Шомысов чужӧма 1893-ӧд вося ода-кора тӧлысь 29-ӧд лунӧ Вӧлӧгда губерняын Усть-Сысольск уездса Скӧрӧдумын (ӧні Коми Республикаса Кулӧмдін районысь Помӧсдін сикт овмӧдчӧмин улӧ пырысь грезд). Дас ӧти челядя (8 пи да 3 ныв) семьяын вӧлӧма сизимӧдӧн.

1914-ӧд воын В.А. Шомысовӧс босьтӧны царскӧй армия. Веськалӧма сэтчӧ сизим вок костын пудъясьӧм бӧрын. Сы кадӧ сылӧн ыджыдджык Иван вокыс служитӧма нин армияас. Егор Васильевич Шомысов кывъяс серти, сылӧн батьыс вӧлі ранитчӧма, веськавлӧма турцияса пленӧ, гортас воӧма 1917-ӧд воын.

Сигудӧкӧн ворсӧм

Бура ворсӧма некымын сикас коми йӧзкостса шылада инструментӧн (баян, гудӧк, сигудӧк), ачыс вӧчавлӧма найӧс. Сигудӧкӧн ворсны велалӧма ыджыдджык воксяньыс.

В.А. Шомысов йылысь паськыда кутісны тӧдны нималана шылад тэчысь, коми шылада фольклор туялысь Прометей Ионович Чисталёвлӧн экспедицияяс бӧрын. Скӧрӧдумын паныдасьлӧм бӧрын найӧ нӧшта на некымынысь аддзысьлӧмаӧсь. Сигудӧкӧн ворсысь петкӧдлӧма ворсан сямсӧ да вӧчӧма некымын инструмент. Ӧти инструмент 1970-ӧд воясын веськалӧма И.М. Глинки нима шылада культуралӧн шӧр музейӧ (Москва). Та кадӧ жӧ Д.В. Шомысовӧн вӧчӧм кык сигудӧк воӧма Коми республикаса краеведческӧй музейӧ.

Сигудӧк вӧчӧмыс да ворсан сямыс вуджӧма сідзжӧ Митрей пиыслы.

Кулӧма 1981-ӧд воын.

Семья

1918-ӧд вося ода-кора тӧлысь 9-ӧд лунӧ венчайтчӧма Помӧсдінса Успенньӧ вичкоын. Гӧтырыс Дёмин Наталья Георгиевна (Пеп рӧдысь). Кыпӧдӧмаӧсь ыджыд керка, ӧтлаын олӧмаӧсь 62 во. Чужтӧмаӧсь да быдтӧмаӧсь 8 кага: Мария (1918), Анна (1924), Николай (1925), Феодосий (1927), Егор (1929), Дмитрий (1931), Иван (1933) да Елизавета (1937).

Ӧшмӧсъяс

• Чисталёв П. И. Коми сигудöк и русский гудок // Финно-угорский музыкальный фольклор и взаимосвязи с соседними культурами / Сост. И. Рюйтел. — Таллинн: Ээсти Раамат, 1980. — С. 38—47.
• Чисталёв П. И. Коми народные музыкальные инструменты. — Сыктывкар: Коми кн. изд-во, 1984. — 104 с.
• Панюков А.В. Музыкальный фольклор: инструментальные традиции // Атлас Республики Коми. — М.: Феория, 2011. — С. 409.