Фин-йӧгра войтырлӧн VII Ставмирса конгресс (2016)
Фин-йӧгра войтырлӧн VII Ставмирса конгресс — Фин-йӧгра войтырӧс ӧтувтысь Ставмирса конгресс, муніс Финляндияса Лахти карын 2016 вося лӧддза-номъя тӧлысь 15—17 лунъясӧ. Медшӧр сёрнитанторйыс — «Фин-йӧгра мир — зумыд сӧвмӧмлань».[1]
История[вежны | Вежны кодировкаын]
VII Конгресс котыртӧм вӧсна кывкутӧ «Финляндия-Россия» котыр мукӧд суомиса общественнӧй котыръяскӧд ӧтвылысь. Нуӧдӧм вылӧ сьӧм сетӧма Суомиса культура да велӧдӧм министерство.
Канмуяс да бӧрйӧмаяс[вежны | Вежны кодировкаын]
Конгресс котыртысьяслӧн висьталӧм серти, Лахтиӧ воӧма 174 делегат, 370 гӧгӧр наблюдатель да 50 сайӧ журналист.[2]
Бӧрйӧмаяслӧн лыддьӧг йӧзӧдӧма Фин-йӧгра войтырлӧн Консультативнӧй комитет сайтын:[3]
| Войтыр да бӧрйӧма лыд | ||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|
| комияс | удмуртъяс | мари | мордва (мокша, эрзя) | эстъяс | маддяръяс | финъяс | Перымса комияс | вепсъяс | (карелъяс, тверса карелъяс | ижора | водь | инкери финъяс | вӧгулъяс | ӧстякъяс | сето | квенъяс | ливъяс | саамияс | яранъяс | нганасанъяс | селькупъяс | энечьяс |
| 17 | 5 | 8 | 5 | 20 | 20 | 20 | 1 | 10 | 13 | 4 | 2 | 10 | 7 | 10 | 10 | 4 | 1 | 4 | 2 | 1 | - | 1 |
Наблюдательясӧн волісны сідзжӧ Норвегияысь, Шотландияысь, Ыджыд Британияысь, Латвияысь корӧм йӧз, ЮНЕСКО да ООН, власьт петкӧдлысьяс, культураын да наукаын зільысьяс.
Конгресс восьтӧм[вежны | Вежны кодировкаын]
Конгресс кыпыда восьтӧма лӧддза-номъя тӧлысь 15—ӧд лунӧ Сибелиус керкаын. Сёрнитісны Суомиса президент Саули Ниинистё, Эстмуса президент Тоомас Хендрик Ильвес, Маддярса президент Янош Адер. Россияса культура министрӧс вежысь Александр Журавский лыддис Россияса президент Володь Путинсянь телеграмма, кӧні вӧлі пасйӧма финн-йӧгра войтырлӧн мир сӧвмӧдӧмӧ ыджыд пай йылысь: «Финно-угорские народы, проживающие на обширных пространствах Евразийского континента, внесли большой вклад в развитие человеческой цивилизации. Их уникальное духовное наследие, отражающее, в частности, глубокое понимание природы, давно стало достоянием мировой культуры … Уверен, что выработанные в ходе ваших дискуссий идеи и инициативы найдут практическое применение, будут способствовать дальнейшему расширению взаимовыгодного международного сотрудничества, укреплению понимания и доверия между гражданами различных стран».[4]
Медшӧр докладӧн висьтасис Суомиса велӧдӧм да наука министр Санни Грахн-Лаасонен. Фин-йӧгра войтырлӧн консультативнӧй комитетлӧн удж йылысь сёрнитіс комитетӧн веськӧдлысь Валерий Марков. Конгресс вылӧ локтысьясӧс чолӧмаліс сідзжӧ Лахти карса мер Юрки Мюллювирта.
Секцияяс[вежны | Вежны кодировкаын]
Конгресс дырйи видлалісны фин-йӧгра войтырлӧн кывъяс, культура видзӧм да сӧвмӧдӧм, вужвойтыр да ичӧт лыда войтыр инӧдъяскӧд йитчӧм юалӧмъяс. Ужаліс вит тематическӧй чукӧртчылӧм: «Финн-йӧгра кывъяс да культураӧн вӧдитчӧмын да тӧдмалӧмын йитӧдъяс» (Преемственность в освоении и использовании финно-угорских языков и культур, «Фин-йӧгра юӧртан ылдӧс: сӧвман туйяс» (Финно-угорское информационное пространство: перспективы развития); «Гражданскӧӥ йӧзкотыр да власьт» (Гражданское общество и власть), «Экономика да гӧгӧртас» (Экономика и окружающая среда); «Демографияын да миграциын вежсьӧмъяс. Важ да выль диаспораяс» (Демографические и миграционные процессы. Старые и новые диаспоры).
Шойччӧм[вежны | Вежны кодировкаын]
Конгресс вылӧ локтысьяслы вӧлі дасьтӧма культурнӧй уджтас. Конгресс восьтігӧн сьыліс саами рэп-артист Айлу Валле, петкӧдчис Лахти карса йӧктан училишӧысь томуловлӧн котыр да Лахти карса консерваторияысь камернӧй оркестр. Лӧддза-номъя тӧлысь 15 лунӧ «Метро» клубын сьылісны «Ääninen» котыр, Карелияысь Сантту Карху Айлу Валле. Лӧддза-номъя тӧлысь 16 лунӧ карса шӧр изэрдын пансис флеш-моб да петкӧдчисны фин-йӧгра сьылан-йӧктан котыръяс. Рытнас жӧ конгрессӧ пырӧдчысьяслы да Лахтиса олысьяслы концерт петкӧдліс Лахтиса Симфоническӧӥ оркестр.
Лӧддза-номъя тӧлысь 17—18 лунъсӧ Сибелиус керкаын муніс «Лахтиса поэтическӧй марафон» фестиваль.
Бӧрйысьӧмъяс да кывкӧртӧдъяс[вежны | Вежны кодировкаын]
Фин-йӧгра войтырлӧн Консультативнӧй комитетӧн веськӧдлыны бӧрйӧма карел Татьяна Клеерова, коді веськӧдлӧ «Карел войтырлӧн котырӧн».[5]
Конгресс вылӧ бӧрйӧмаяс шуисны Фин-йӧгра войтырлӧн VIII Ставмирса конгресс нуӧдны 2020 вося моз тӧлысьын Эстонияса Тарту карын.[6]
Валерий Марков серти, конгресс муніс бура, ассьыс могъяссӧ вӧчис. Сьӧкыдлунъяс вылӧ видзӧдтӧг, Лахтиӧ локтіс унджык наблюдатель, но этшаджык делегат. Вынсьӧдӧм Резолюция артмис дженьыдӧн, сы дорӧ дасьтасны на секцияяслысь Рекомендацияяс.[2]
Ӧшмӧсъяс[вежны | Вежны кодировкаын]
- Фин-йӧгра войтырлӧн Консультативнӧй комитет сайт (рочӧн)
- Делегация от Коми станет самой представительной из всех финно-угорских республик на Всемирном конгрессе в Лахти // «Комиинформ» юӧр сетан агентство (2016.06.11; рочӧн)
- Конгресс Финно-угорских народов грозит превратиться в политическое судилище // «Аргументы в Ижевске» (2016.06.14 лун; рочӧн)
- Оливер Лооде: Мы хотели бы на один день создать атмосферу свободного диалога // «Uralistica» сайт (2016.06.11 лун; рочӧн)
Ыстӧдъяс[вежны | Вежны кодировкаын]
- ↑ В Лахти пройдёт VII Всемирный конгресс финно-угорских народов // Фин-йӧгра войтырлӧн консультативнӧй комитет сайт (2016.06.15; рочӧн)
- ↑ 2,0 2,1 Пархачева Я. Делегаты конгресса финно-угорских народов в Лахти поделились впечатлениями от поездки // «Комиинформ» юӧр сетан агентство (2016.06.22 лун; рочӧн)
- ↑ Фин-йӧгра войтырлӧн Консультативнӧй комитет сайт
- ↑ Путин отметил большой вклад финно-угорских народов в развитие цивилизации // РИА-Новости сайт (2016.06.15 лун; рочӧн)
- ↑ На Всемирном финно-угорском конгрессе выбрали нового председателя консультативного комитета // «Национальный акцент» сайт (2016.06.17 лун; рочӧн)
- ↑ Следующий Всемирный конгресс финно-угорских народов проведут в Тарту // «Национальный акцент» сайт (2016.06.17 лун; рочӧн)