Трейнспöттинг
„Трейнспöттинг“ („Trainspotting“) – 1996-öд вося шотландияса драма, сьӧд комедия, режиссёрыс Дэнни Бойл (Danny Boyle). Сэні ворсӧны Юан Макгрегöр (Ewan McGregor), Юэн Бремнер (Ewen Bremner), Джöнни Ли Миллер (Johnny Lee Miller), Кевин Маккидд (Kevin McKidd), Роберт Карлайл (Robert Carlyle) да Келли Макдoнальд (Kelly Macdonald). Фильмсӧ вöчöма Ирвин Уэлшлöн (Irvine Welsh) 1993-öд воын гижлöм сэтшӧм жӧ нима роман подув вылын. Фильмыс петіс 1996-öд вося урасьӧм тӧлысь 23-öд лунӧ.
Фильмас петкöдлöма героинлы сетчöм йöзöс, кодъяс кыдзкö-мыйкö вермöдчӧны овны Эдинбург карлöн гöль юкöнын. Наркоманияысь кындзи фильмас нӧшта висьтавсьӧ эдинбургса гӧль да судзсьытöм олöм йылысь.
Петöм бöрас фильмсö примитісны зэв бура да уна критик пыртiс сійӧс 1990-ӧд воясся медбур фильмъяс лыдö. Британскӧй киноинститутлӧн (BFI) „ХХ нэмся 100 медбур британскӧй фильм“ лыддьӧгын „Трейнспöттинг“-ыс дасӧд. 2004-öд воын кино видзӧдысьяс шуисны сiйöс кинолöн историяын медся бур шотландияса фильмӧн. 2017-öд воын „Time Out“ журналын 150 актёр, режиссёр, продюсер да критик шуисны „Трейнспöттинг“-сö быд кадся дасӧд медбур британскӧй фильмӧн.
„Трейнспöттинг“-ын юргысь музыкасö тшӧтш жö ёна вылö донъялӧны. Ассьыс пайсö фильмас пуктіс уна нималана музыкант, шуам, Игги Пöп (Iggy Pop), Лу Рид (Lou Reed) дa Дэвид Бöуи (David Bowie). 2007-öд воын „Vanity Fair“ журналса редакторъяс пуктісны фильмса музыкасö сизимöд местаö кинолöн историяын. Entertainment Weekly-лӧн „100 медбур саундтрöк“ лыддьӧгын сійӧ лоис 17-ӧдӧн.
Фильмыслӧн эм нӧшта мöд юкӧн – „T2 Трейнспöттинг“, коді петіс 2017-öд вося тӧвшӧр тӧлысьын.