Терентьев Алексей Иванович
Терентьев Алексей Иванович (1928—2003) — вӧр петкӧдан машинаса водитель, Социалистическӧй Уджвывса герой.
Олан туй
[вежны | Вежны кодировкаын]Чужӧма 1928-ӧд вося рака тӧлысь 30-ӧд лунӧ Изьва-Печора уездса Аким грездын (ӧні Коми Республикаса Сосногорск район) уна челядя семьяын. 1942-ӧд воын батьсӧ босьтӧмаӧсь Гӧрд армияӧ, 1943-ӧд воын батьыс юӧртӧг вошӧма, а мамыс кулӧма. Алексейлы ковмӧма ичӧтджык чой-вок бӧрсяыс видзӧдны. Гожӧмнас уджалӧма колхозын, тӧвнас кер петкӧдӧма.
1945-ӧд воын сійӧс индӧмаӧсь полеводческӧй бригадаӧ веськӧдлысьӧн. Кык во мысти нин сылӧн бригадаыс петӧма медводдзаяс лыдӧ Ухта районса мукӧд бригадаяс пӧвстын овощь быдтӧм серти. Бригадаыслы вӧлі сетӧма Коми АССР-са видз-му овмӧс министерстволӧн диплом да ВЛКСМ-са Почёта грамота.
Сӧветскӧй армияын служитӧм бӧрын пырӧма уджавны са заводӧ. Сэсся вуджӧма «Печоралес» комбинатысь Ухта леспромхозлӧн Айюва лесопунктӧ. Сэні уджалӧма электропильщиклы отсасьысьӧн, вӧр пӧрӧдысьӧн, а 1957-ӧд воын водительяслысь курсъяс помалӧм бӧрын пуксьӧма лесовоз руль сайӧ. Шедӧдӧма ыджыд вермӧмъяс. Сизим вося плансӧ вӧчӧма вит воӧн.
СССР-са Вылыс Сӧвет Президиумлӧн Шуӧмӧн 1966-ӧд вося косму тӧлысь 28-ӧд лунӧ Коми АССР-са промышленносьт сӧвмӧдӧмӧ ыджыд пай пуктӧмысь сылы сетӧма Социалистическӧй Уджвывса герой ним, Ленин орден да «Чарла да Мӧлӧт» зарни медаль.
1966-ӧд воын вӧзйис нуӧдны кер петкӧдӧм серти республикаса ордйысьӧм. Ассьыс кӧсйӧмъяссӧ олӧмӧ пӧртіс кадысь водз: ЗИЛ-157 автомобильӧн петкӧдіс 19 сюрс сайӧ кубометр кер да плансӧ вевтыртіс 3,5 сюрс кубометр вылӧ.
А.И. Терентьевӧс бӧрйылісны ВЦСПС-са XIV да XV съездъяс вылӧ делегатӧн (1968, 1972), а сідзжӧ бумажнӧй да деревообрабатывающӧй промышленносьтын уджалысьяслӧн VIII-ӧд съездса делегатӧн.
Олӧма Коми АССР-са Ухта районын. Кулӧма 2003-ӧд вося тӧвшӧр тӧлысь 21-ӧд лунӧ.
Паметь
[вежны | Вежны кодировкаын]- Сосногорскын казьтылана пӧв.
Ошканпасъяс
[вежны | Вежны кодировкаын]- Ленин орден (28.04.1966)
- «Чарла да Мӧлӧт» зарни медаль (28.04.1966)
- «1941-1945 воясӧ Айму вӧсна Ыджыд тыш дырйи бур уджысь» медаль (11.03.1985)
- Вӧр пӧрӧдӧмын да кер кылӧдӧмын Почёта мастер (1967)