Куратов Ӧльӧш Вань

Файл:Kuratov.jpg

Куратов Ӧльӧш Вань

Куратов Ӧльӧш Вань рочӧн Куратов Иван Алексеевич (1839–1875) - медводдза коми поэт, коми литературалы подув пуктысь.

• 1839, сора 18 лун - чужис Вӧлӧгда губерниялӧн Усть–Сысольск уездса Кебра сиктын (ӧнi Коми Республикаса Сыктыв районлöн Кебра сикт).

1850–1860–öд воясö велöдчис Яренскса духовнöй училищеын да Вӧлӧгдаса духовнӧй семинарияын. Ветлiс Канкарӧ, но водзö велöдчöмыс эз артмы сьöм абутöм вöсна.

1861–1865–öд воясö уджалiс велöдысьöн Усть–Сысольскса духовно–приходскöй училищеын.

1866–öд воö Казанын аудиторъясöс дасьтан школа помалöм бöрын (военнöй юрист) ыстiсны уджавны Семипалатинскö, во мысти вуджöдiсны Семиреченскöй обласьтса Верный карö (öнi Алматы, Казахстан).

1871–öд восянь уджалiс чиновникöн губернатор правлениеын.

Иван Куратов – медводдза коми поэт, коми литературалы подув пуктысь. Кывбуръяс босьтчис гижны Яренскын на. Поэт ас водзас пуктiс ыджыд мог – велöдны коми йöзöс да висьтавны налöн олöм йылысь. Коми йöзлысь ХIХ–öд нэмса олöмсö петкöдлiс "Закар ордын", "Понкöд", "Гöль зон", "Пемыд", "Выль сьыланкыв" да мукöд кывбуръясын. Йöзлысь оласногсö восьтic "Коми бал", "Яг морт", "Важся коми войтырлöн кодралöм" гижöдъясын.

Иван Куратов вуджöдic роч да Рытыв Европаса поэтъяслысь кывбуръяс, кыдз ученöй–лингвист лöсьöдiс коми грамматика.

1866–öд воын "Вологодские губернские ведомости" газетын И.Куратов йöзöдiс статья "Зырянские песни". Уджас пыртiс ассьыс вит кывбур, но кипассö эз пукты.

Поэтлöн нимыс лои паськыда тöдса 1917–öд вося Октябр революция бöрын. Медводдзаысь тöдлытöм коми поэт йылысь 1923–öд воö юöртic "Парма ёль" журнал. 1926–öд воын "Коми гижысьяс" небöгын вöлi йöзöдöма кöкъямыс кывбур.

Поэтлöн 100 во тыригкежлö, 1939 воын, Коми небöг лэдзанiнын петiс кык небöгö öтувтöм гижöд чукöр.

• 1875, вӧльгым 29 лун - Иван Куратов кулiс 36 арöсöн Верный карын.