Ӧтувъя диктант
Ӧтувъя диктант — коми кыв вылын диктант гижан ӧтувъя акция, кодӧс нуӧдӧ «Коми войтыр» ӧтмунӧм да коми том войтырлӧн «МИ» котыр. Медводдзаысь нуӧдӧма 2015 вося урасьӧм тӧлысь 18-ӧд лунӧ. Сідзжӧ шуӧны Коми диктант.
История[вежны | Вежны кодировкаын]
Нуӧдны коми кыв вылын ӧтувъя диктант вӧзйыліс коми том войтырлӧн «МИ» котыр 2014 воӧ Кулӧмдін районса Помӧсдін сиктын фин-йӧгра томуловлӧн ФУРОР Войтыркостса форум дырйи.[1]. Диктант кежлӧ дасьтӧма торъя бланк.
Ӧтувъя диктант 2015 воын[вежны | Вежны кодировкаын]
Диктантлы гижӧдсӧ дасьтіс нималана коми гижысь Владимир Тимин. Сійӧ шусис «Чужан му йылысь кыв». Диктант эз вӧв сьӧкыд кыв гижанног да чут-чутік пуктанног боксянь, но мукӧдсӧ крукыштіс ас нимъяс гижӧм.[2]
Жури[вежны | Вежны кодировкаын]
Сыктывкарын диктант донъялӧм могысь вӧлі котыртӧма 5 морта жури. Сэтчӧ пырисны: «Коми войтыр» ӧтмунӧмлӧн Президиумӧ пырысь, филологияса кандидат Ӧльӧш Рассыхаев (веськӧдлысь), Коми Республикаын Велӧдӧм сӧвмӧдан институтысь уджалысь А.Н. Карманова, Сыктывкарса канму университетлӧн Психология да педагогика институтысь велӧдысь, педагогика наукаясса кандидат С.Н. Терентьева, Коми Республикаса вӧр-ва видзӧм да ресурсъяс серти юӧртан Фондлӧн картография юкӧнын уджалысь С.Ф. Мамонтова, «МИ» котырса веськӧдлысьӧс вежысь В.П. Чупров.
Кыв гижанног да чутік пуктігӧн журиӧ пырысьяс вӧзйӧны мыджсьыны «Коми орфография кывкуд» (2008) небӧгын индӧм правилӧяс вылӧ.
Гижысь лыд[вежны | Вежны кодировкаын]
Котыртысьяслӧн арталӧм серти, ассьыс тӧдӧмлунсӧ 2015 воын донъявны воліс 500 сайӧ морт. Медводз диктант гижисны Москваын олысь комияс. Россияса Президент бердын Коми Республикаса Пырпеткӧдланінын гижисны 23 морт.[3]
Юркарын диктант гижысьяс ӧдва тӧрисны Сыктывкарса канму университетлӧн кык ыджыд жырйӧ. Волісны ас вын видлыны студентъяс да университет помалысьяс, велӧдысьяс да журналистъяс, чина войтыр да арлыда йӧз. Ыджыд котыр локтіс Искусствояс гимназияысь. Сыктывкарын диктант гижисны 110 гӧгӧр морт. Диктант лыддис университетса велӧдысь, кыв туялысь, филологияса доктор В.М. Лудыкова. Диктант гижысьяс лыдын вӧліны «Коми войтыр» ӧтмунӧмын нырщикъяс В.П. Марков, С.И. Габов.
Укваын техническӧй канму университетын гижисны 40 морт[4], Петыркарын — 19.
Унаӧн пырӧдчисны диктант гижӧмӧ коми сиктъясысь. Кулӧмдін сиктса школаын гижисны 34 морт, Кулӧмдін районса Помӧсдінын — 90 морт (20 версттьӧ да 70 велӧдчысь), Пожӧгын — 73 морт.
Удора районын диктантасисны Шӧр библиотека подув вылын Косланын, Усогорскын, Благоевын, Важгортын, Чимын, Слӧбӧдаын, Ёвкӧджын, Йӧртымдінын — ставнас морт 80.
Изьва районын гижисны челядьлы содтӧд тӧдӧмлун сетан шӧрин подув вылын, Изьва районса Гамын — школаын. Пырӧдчисны диктантӧ Сыктывдін районса Ыб да Паджга, Кӧрткерӧс да Абъячой юрсиктъяс.
Комиӧн диктант гижисны и Инта карын, Петрунь да Косьювом сиктъясын. Ставнас 71 морт.
Княжпогост районын диктант гижны окотитысьыс чукӧрмис 76 морт: Емваын 30-ӧн, Сьӧська сиктын 20-ӧн, Мещура посёлокын 8-ӧн, Туръя сиктын 18 морт. Арлыд сертиыс: дас арӧссянь 70 арӧсӧдз.[5]
Дон пуктӧм[вежны | Вежны кодировкаын]
Уджъяс донъялігӧн колӧ тӧд вылын кутны:
- Быд ӧшыбка лыддьысьӧ 1 ӧшыбкаӧн.
- Ӧти кывйын кӧ некымын орфография ӧшыбка, быдӧн лыддьысьӧ торйӧн («четчиштны» — «чеччыштны» пыдди)
- Ӧти ӧшыбкаӧн лыддьысьӧ, абу кӧ пуктӧма ӧти либӧ кык чутік, шуам, пыртана кывъясын («тайӧ, дерт жӧ колӧ…»).
- Диктантын кӧ ӧткодь ӧшыбка вӧчӧма ӧти и сійӧ жӧ кывйын, тайӧ лоӧ ӧти ӧшыбкаын (шуам, «воччыны», «воччыны» — «вотчыны» пыдди).
Диктантысь дон пуктігӧн арталӧны кыв гижигӧн да чут-чутік пуктігӧн ӧшыбкаяс.
| Дон | Кыв гижигӧн /
Чут-чутік пуктігӧн ӧшыбка |
|---|---|
| «Вит» | 0/0, 0/1 |
| «Нёль» | 0/2; 0/3; 0/4;
1/0; 1/1; 1/2; 1/3; 2/0; 2/1; 2/2 |
| «Куим» | 0/5; 0/6; 0/7; 0/8;
1/4; 1/5; 1/6; 1/7; 2/3; 2/4; 2/5; 2/6; 3/0; 3/1; 3/2; 3/3; 3/4; 3/5; 4/0; 4/1; 4/2; 4/3; 4/4 |
Кывкӧртӧдъяс[вежны | Вежны кодировкаын]
2015 воын коми диктант гижысьяслысь уджъяссӧ донъялӧма со тадзи:
| Сикт / кар | 5 (вит) | 4 (нёль) | 3 (куим) |
|---|---|---|---|
| Сыктывкар | 1 | 24 | 31 |
| Уква | 1 | 18 | ? |
| Москва | — | — | 2 |
| Петыркар | — | 1 | 4 |
| Помӧсдін | 12 | 22 | ? |
| Кулӧмдін | 6 | 24 | ? |
Ӧшмӧсъяс[вежны | Вежны кодировкаын]
- «Коми войтыр» ӧтмунӧмлӧн сайт
- Карманова А.Н., Коснырева Р.И., Кренделева Т.В. Коми орфография кывкуд. — Сыктывкар, 2008. — 253 л.б.
Ыстӧдъяс[вежны | Вежны кодировкаын]
- ↑ Тотальный диктант в Сыктывкаре напишут на коми языке // «Комиинформ» сайт (2015.01.30; рочӧн)
- ↑ Сидорова В. В Сыктывкаре, Москве, Санкт-Петербурге провели диктант на коми языке // «Красное знамя» сайт (2015.02.18; рочӧн)
- ↑ В Москве прошел диктант на коми языке // «Комиинформ» сайт (2015.02.16; рочӧн)
- ↑ УГТУ провел первый диктант на коми языке // БНКоми сайт (2015.02.19; рочӧн
- ↑ Княжпогост районса олысьяс пасйисны Чужан кывлысь лун! // «Коми войтыр» сайт (2015.02.23)