Слава орден

Босьтӧма Wikipediaысь
I тшупӧда Слава орден
II тшупӧда Слава орден
III тшупӧда Слава орден

Слава орден (рочӧн: Орден Славы) — СССР-ын войнаса орден. Лӧсьӧдӧма СССР-са Вылыс Сӧветысь Президиумлӧн «Об учреждении ордена Славы I, II и III степени» Шуӧмӧн 1943 вося вӧльгым тӧлысь 8 лунӧ. Наградасӧ сетӧны Краснӧй армияса радӧвӧйяслы да сержантъяслы, а авиацияын — сідзжӧ и младшӧй лейтенантъяслы. Сетсьӧ торъя мортлӧн подвигысь; воинскӧй часьтъяслы эз вичмӧдлыны.

Слава орден статут да лента рӧм сертиыс ӧткодь революцияӧдзса Россиялӧн медся нималана наградакӧд — Георгиевскӧй кресткӧд.

История[вежны | Вежны кодировкаын]

Слава орденлӧн эм куим тшупӧд: 1-дза тшупӧда орден медвылыс — зарниысь, а II да III — эзысьысь (Мӧд тшупӧда орденлӧн зарниӧдӧма шӧр медалёныс). Медводз вӧлі сетӧма 3, 2, а сэсся 1-дза тшупӧда орден.

1978 во кежлӧ Айму вӧсна Ыджыд тыш дырся подвигъясысь III тшупӧда Слава орден сетӧма миллион сайӧ мортлы, II тшупӧда — 46 сюрс сайӧ мортлы, I тшупӧда — 2562 мортлы.

Сёрӧнджык арталӧмъяс серти, Слава ордена тыр кавалер лыдыс содіс 2674 мортӧдз, на лыдын — нёль нывбаба.

Слава ордена тыр кавалеръяслы — лётчик Иван Григорьевич Драченколы, саридзса пехотинец Павел Христофорович Дубиндалы да артиллеристъяс Николай Иванович Кузнецовлы, Андрей Васильевич Алёшинлы Айму вӧсна Ыджыд тыш дырйи нӧшта сетӧма Сӧветскӧй Союзса Герой ним.

1945 воын тӧвшӧр тӧлысь 14 лунся Висла-Одер операцияын Висла юлӧн шуйга берегвывса тышын смеллунысь — 77-ӧд стрелковӧй дивизияса 215-ӧд Краснознамённӧй полклӧн 1-дза батальонысь став радӧвӧйлы, сержантлы да старшиналы вӧлі сетӧма Слава орден; ротаса командиръяслы — Гӧрд Дӧрапас орден; взводса командиръяслы — Александр Невский орден, батальонса командир Б. Н. Емельянов лои Сӧветскӧй Союзса Геройӧн. Тайӧ вӧлі дзик ӧти тэчас, кытысь боецьяслы ӧти тышысь ставныслы сетӧма Слава орден.

Слава орден сетсьӧ СССР-са Вылыс Сӧветысь Президиумлӧн Шуӧмӧн.

Слава ордена тыр кавалеръяслы вимчӧдӧны вылынджык тшупӧда воинскӧй звание:

  • радӧвӧйлы, ефрейторлы да сержантлы — старшина;
  • старшиналы — младшӧй лейтенант;
  • авиацияын младшӧй лейтенантлы — лейтенант.

Слава орден новлӧны морӧслӧн шуйга бокас. Эм кӧ нин СССР-са мукӧд орден, ӧшӧдӧны «Почёт пас» орден бӧрын.

Слава ордена тыр кавалеръяс[вежны | Вежны кодировкаын]

Слава ордена тыр кавалеръяслы 1967 да 1975 воясӧ вӧлі сетӧма содтӧд кокньӧдъяс, мыйӧн ӧткодялісны найӧс Сӧветскӧй Союзса Геройяскӧд. Налы сетісны ставсоюзса персональнӧй пенсиа, керкаын олӧмысь ыджыд кокньӧд, дон босьттӧг новлӧдлӧм и с.в. Россияын став тайӧ кокньӧдыс колис.

1976 восянь Слава ордена тыр кавалеръяслы военнӧй комиссариатъяс кутісны сетавны орденскӧй небӧгъяс.

Видзӧдӧй тшӧтш[вежны | Вежны кодировкаын]

Ӧшмӧсъяс[вежны | Вежны кодировкаын]

Ыстӧдъяс[вежны | Вежны кодировкаын]