Рочев Николай Васильевич

Рочев Николай Васильевич (1962—2018) — общественнӧй удж вӧчысь.

Олан туй

Николай Рочев чужӧма 1962-ӧд вося ӧшым тӧлысь 5-ӧд лунӧ Изьва районса Кыдзкар сиктын.

1977-ӧд воын помалӧма Гамса 8 класса школа, 1979-ӧд воын — Мокчойса шӧр школа. Коми канмуса педагогика институтысь естественно-географическй пакультет помалӧм бӧрын велӧдӧма школаын география, история да удж. Гамса школаын вӧлӧма директорӧс вежысьӧн.

Веськӧдлӧма спортивнӧй туризм кружокӧн. Сылӧн веськӧдлӧм улын школьникъяс быд во ветлӧдлӧмаӧсь лызьӧн, подӧн да ва походъясӧ (I–IV сьӧкыдлун категория) Изьва районті, Приполярнӧй Урала, Тянь-Шаньӧ, Байкал ты бердӧ. Ачыс лызьӧн ветлывлӧма 5-6-ӧд сьӧкыдлун категорияа лызь походъясӧ. Лызь туризм Россияса чемпионатын шедӧдлӧма коймӧд места. Кайлӧма походасигӧн Е. Корженевская нима пикӧ (7 195 м.) да Коммунизм пикӧ (7 495 м.); тӧвъяснас кайлывлӧма Тянь-Шань гӧра йывъясӧ. 2008-ӧд воын лызьӧн тӧвнас ветлӧма Вӧркутасянь Ямалӧ (2008 год). 2010-ӧд воын ветлӧма Дятлов перевалӧ, кӧні реконструируйтӧмаӧсь 1959-ӧд вося лоӧмторъяс, да вӧлӧма экспедиция веськӧдлысьӧс вежысьӧн.

Некымын созыв Н. В. Рочев вӧлӧма Изьва район Сӧветса депутатӧн. 2004—2005-ӧд воясын вӧлӧма Изьва район Сӧветса веськӧдлысьӧс вежысьӧн удждон босьтӧмӧн, а 2005-ӧд восянь 2007-ӧд вося лӧддза-номъя тӧлысьӧдз — Изьва районса администрацияӧн веськӧдлысьӧс медводдза вежысьӧн. Та кадӧ вӧлі дасьӧма Изьва районын туризм сӧвмӧдан уджтас да 2007—2011-ӧд вояс вылӧ Изьва район сӧвмӧдан уджтас.

Кулӧма Сыктывкарын 2018-ӧд вося моз тӧлысь 31-ӧд лунӧ онкология висьӧмысь.

Общественнӧй удж

2010-ӧд воын изьваса комияслӧн регионкостса ӧтмунӧмлӧн VII-ӧд съезд вылын вӧлі бӧрйӧма «Изьватас» ӧтмунӧмса веськӧдлысьӧн, 2014-ӧд воын — выль пӧв. Печора доръян комитеткӧд ӧтвылысь «Изьватас» котыр дорйӧ изьваса комиясӧс мусир перйысьяслӧн вывтіасьӧмысь.

Ӧшмӧсъяс

• Народный избранник и лидер «Изьватас» // «Миян Ижма медся дона» сайт (2015.08.30; рочӧн)